قازاقستاندىق مەرگەندەر الەكساندرا لە مەن يسلام ساتپايەۆ ايچي مەن ناگويادا ءوتىپ جاتقان 2026 جىلعى ازيا ويىندارىندا ارالاس دۋەتتەر سايىسىنىڭ فينالىنا شىعا المادى. ولار ىرىكتەۋ كەزەڭىندە 629،1 ۇپاي جينادى، دەپ حابارلايدى infohub.kz سايتى.
وليمپيادا-2024ء-تىڭ قولا جۇلدەگەرلەرى 10 مەتر قاشىقتىقتان پنەۆماتيكالىق ۆينتوۆكادان اتىستى. ىرىكتەۋ قورىتىندىسى بويىنشا قازاقستاندىق دۋەت بەسىنشى ورىنعا تۇراقتادى، ال فينالعا ۇزدىك ءتورت كوماندا جولداما الدى.
ەڭ جوعارى ناتيجەنى جۇڭگو قۇراماسى كورسەتتى – 638،9 ۇپاي. قىتايلىق مەرگەندەر ىرىكتەۋدىڭ جاڭا الەمدىك رەكوردىن ورناتتى. فيناليستەر تورتتىگىنە ءۇندىستان، وڭتۇستىك كورەيا جانە جاپونيا كوماندالارى دا ەندى.
2024 جىلى پاريجدە وتكەن وليمپيادا ويىندارىندا لە مەن ساتپايەۆ وسى ديسيپلينادا قولا مەدال جەڭىپ العان بولاتىن.
ويىنداردىڭ رەسمي اشىلۋى 19 قىركۇيەكتە ءوتتى. 45 ەلدىڭ سپورتشىلارى قاتىساتىن كەشەندى جارىستاردا 460 مەدال كومپلەكتىسى ساراپقا سالىنادى. ونىڭ 217ء-سى – ەرلەر اراسىندا، 204ء-ى – ايەلدەر اراسىندا، 39-ى – ارالاس رازريادتاردا. ازيادا-2026-دا قازاقستان قۇراماسىنىڭ نامىسىن 35 سپورت تۇرىنەن 558 سپورتشى قورعايدى.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتيستەر جولامان بيگابىل مەن سوفيا بەرۋلسەۆا ويىندار چەمپيونى اتاندى. ەكىنشى كۇننەن كەيىن قازاقستان بەيرەسمي كوماندالىق ەسەپتە ءتورتىنشى ورىندا تۇردى.