پورتۋگاليا قۇراماسىنىڭ جارتىلاي قورعاۋشىسى رافاەل لەاۋ كريشتيانۋ رونالدۋدىڭ ۇلتتىق كوماندادان جانجالمەن كەتۋىنە قاتىستى پىكىر ءبىلدىردى، دەپ حابارلايدى infohub.kz سايتى.
ۇلتتار ليگاسىنىڭ 3-تۋرىندا دانياعا قارسى ماچتا پورتۋگاليالىقتار 4:2 ەسەبىمەن جەڭىسكە جەتكەن سوڭ، لەاۋ رونالدۋ توڭىرەگىندەگى جاعدايعا توقتالدى. «بۇل — بىزگە قاتىسى جوق تاقىرىپ. ءبىز تاعى دا كوماندا ەكەنىمىزدى كورسەتتىك. كريشتيانۋ رونالدۋ ۇيدە وتىرىپ، وسى جەڭىسكە قۋانىپ جاتقانىنا سەنىمدىمىن. مەن ونىمەن جاقسى ارالاسامىن جانە ونىڭ قانداي ادام ەكەنىن بىلەمىن، سوندىقتان ايتا الامىن: ەڭ باستىسى — كوماندا. ءبىز تاعى ءۇش ۇپاي جينادىق، توپتا كوش باستاپ تۇرمىز، ەندى دەمالىپ، جەكسەنبىدەگى نورۆەگيامەن ماچقا دايىندالۋ كەرەك»، — دەپ كەلتىرەدى لەاۋدىڭ ءسوزىن «چەمپيونات».
بۇعان دەيىن رونالدۋعا تيەسىلى بولعان پورتۋگاليا قۇراماسىنداعى جەتىنشى ءنومىر ەندى لەاۋعا بەكىتىلگەنى حابارلانعان.
ەسكە سالايىق، كريشتيانۋ رونالدۋ ۇلتتار ليگاسىنداعى ماچتا باپكەر ونى الاڭعا شىعارماعان سوڭ، قۇرامانىڭ جاتتىعۋىنا قاتىسپادى. كەيىن ول كوماندا ورنالاسقان جەردەن كەتۋ تۋرالى شەشىم قابىلداعانىن مالىمدەدى. كەيىنىرەك پورتۋگاليا فۋتبول فەدەراسياسى رونالدۋدىڭ ءوز بەتىنشە كەتۋى نەمەن اياقتالۋى مۇمكىن ەكەنىن ايتتى: وعان ديسكۆاليفيكاسيا مەن ايىپپۇل ءقاۋپى ءتونىپ تۇر.