جاڭا Lexus GX 550ء-نىڭ كاپوتى قولمەن باسقاندا ءيىلىپ كەتەتىنى كورسەتىلگەن ۆيدەو ينتەرنەتتە قىزۋ تالقىعا ءتۇستى، دەپ حابارلايدى infohub.kz سايتى.
اۆتوبلوگەر نازار يۋششۋك Threads جەلىسىندە ءبىر كورمەدە كورسەتىلگەن جاڭا Lexus GX 550ء-دىڭ ۆيدەوسىن جاريالادى. بەينەجازبادا پرەميۋم كولىكتىڭ كاپوتى ازداعان كۇش تۇسكەندە ايتارلىقتاي يىلەتىنى بايقالادى.
جازبا بەلسەندى پىكىرتالاس تۋعىزدى: كەيبىر پايدالانۋشىلار مەتالدى «فولگا» دەپ اتاسا، ەندى بىرەۋلەرى بۇل قاۋىپسىزدىكتىڭ قازىرگى تالاپتارىنا بايلانىستى ەرەكشەلىك ەكەنىن ءتۇسىندىردى.
كەيبىر پىكىر قالدىرۋشىلار كورگەندەرىنە ازىلمەن قارادى:
«جاقسى فولگا. بوياۋىن سىلىپ تاستاسا، دەمالىستا بالىق پىسىرۋگە بولادى».
«مەنىڭ 140-شى قابانىم (Mercedes-Benz W140 – رەد.) باسقاشا، ونىمەن كاماز-داردى سوعۋعا بولادى».
«ءتىپتى مەنىڭ جۇڭگو كولىگىمدە دە ونداي ەمەس».
كوپتەگەن پايدالانۋشىلار يىلەتىن كاپوت كەمشىلىك ەمەس ەكەنىن ەسكە سالدى:
«بۇل پلاستماسسا ەمەس، اليۋميني، الدىڭعى قاناتتارى پلاستيك. قازىرگى تالاپتار (اسىرەسە Toyota/Lexus-تا قاتاڭ) كولىكتىڭ الدىڭعى بولىگىن جۇمساق ەتۋدى مىندەتتەيدى. جاياۋ جۇرگىنشىمەن سوقتىعىسقاندا يكەمدى اليۋميني كاپوت پەن پلاستيك قاناتتار دەفورماسيالانىپ، سوققىنى جۇتادى».
پىكىرلەردە كاپوتتىڭ جۇمساقتىعى جولاۋشىلاردىڭ نەمەسە جاياۋ جۇرگىنشىلەردىڭ قاۋىپسىزدىگىنە قاتىستى دەگەن تالاستار دا بولدى. كەيبىر پايدالانۋشىلاردىڭ پىكىرىنشە، سىرتقى كۋزوۆ پانەلدەرى جاياۋ جۇرگىنشىلەردىڭ جاراقات الۋىن ازايتۋ ءۇشىن جاسالسا، سالونداعى ادامداردىڭ قورعانىسىن كۇش كاركاسى، باعدارلامالاناتىن دەفورماسيا ايماقتارى، بەلدىكتەر مەن قاۋىپسىزدىك جاستىقتارى قامتاماسىز ەتەدى.
ءبىر پىكىر قالدىرۋشى يرونيامەن بىلاي دەدى:
«2026 جىل، ادامدار ءالى دە كولىك تانكتەي بولۋى كەرەك دەپ ويلايدى».
Lexus GX 550ء-دىڭ (گيبريدتى نۇسقاسىن قوسا) IIHS (اقش ساقتاندىرۋ قاۋىپسىزدىك ينستيتۋتى) نەمەسە Euro NCAP (ەۋروپالىق جاڭا اۆتوكولىكتەردى باعالاۋ باعدارلاماسى) ۇيىمدارى تاراپىنان رەسمي سىناقتارى ازىرگە جۇرگىزىلگەن جوق. مودەل اقش-تا سىناققا تاڭدالعان، ءبىراق ناتيجەلەرى ءالى جاريالانعان جوق.
بۇل ءبىرىنشى وسىنداي ۆيدەو ەمەس. 2025 جىلى تاعى ءبىر بلوگەر Lexus LX 700h كولىگىنىڭ كۋزوۆ قاتتىلىعىن كورسەتكەن ەدى.
يىلەتىن كاپوت وزدىگىنەن كولىكتىڭ ساپاسىزدىعىن بىلدىرمەيدى. زاماناۋي كولىكتەر، اسىرەسە سىناقتاردان جوعارى بالل الۋعا باعىتتالعاندار، ءجيى اليۋميني سىرتقى پانەلدەرمەن جابدىقتالادى. ولار بولاتتان جەڭىل، سىرتقى اسەرگە وڭاي دەفورماسيالانادى جانە كولىك سالماعىن ازايتۋعا كومەكتەسەدى.
كۋزوۆتىڭ بەرىكتىگىن سىرتقى مەتالل ەمەس، كۇش قۇرىلىمى، كاپوتتىڭ ىشكى قاڭقاسى جانە باعدارلامالاناتىن دەفورماسيا ايماقتارى انىقتايدى. سوندىقتان پانەلدى قولمەن باسقاندا ءيىلۋى كولىكتىڭ قاۋىپسىزدىگى تومەن دەگەندى بىلدىرمەيدى.
بۇعان دەيىن باسىلىم Lexus LX جانە GXء-تىڭ Dark Horse كونسەپسياسىن العانىن جازعان ەدى.