ماڭعىستاۋ وبلىسىنىڭ ەكى تۇرعىنى 20 تاۋلىككە قاماۋعا الىنىپ، جەتى جىلعا كولىك جۇرگىزۋ قۇقىعىنان ايىرىلدى. سەبەبى ولاردىڭ ءبىرى ماس كۇيىندە، ءارى جۇرگىزۋشى كۋالىگىنسىز بوتەن ادامنىڭ كولىگىن باسقارعان، دەپ حابارلايدى infohub.kz سايتى.
وبلىستىق پوليسيا دەپارتامەنتىنىڭ مالىمەتىنشە، 29 قىركۇيەكتە تاۋشىق — قياقتى باعىتىنداعى جەرگىلىكتى ماڭىزى بار جولدا پاترۋلدىكتەر «Audi» ماركالى كولىكتى توقتاتقان. كولىك رولىندە كولىك باسقارۋ قۇقىعى جوق 39 جاستاعى ەر ادام وتىرعان. ول سونداي-اق الكوگولدىك ماساڭ كۇيدە بولعان.
سوت شەشىمىمەن ەر ادام 20 تاۋلىككە قاماۋعا الىنىپ، جەتى جىلعا كولىك جۇرگىزۋ قۇقىعىنان ايىرىلدى.
كولىگىن ماس دوسىنا سەنىپ تاپسىرعان كولىك يەسى دە جاۋاپكەرشىلىككە تارتىلدى. ءىس ماتەريالدارى بويىنشا، كىلتتى بەرىپ تۇرعان ساتتە 34 جاستاعى بۇزۋشى دا الكوگولدىك ماساڭ كۇيدە بولعان.
سوت ونى دا 20 تاۋلىككە قاماۋعا الىپ، جەتى جىلعا كولىك باسقارۋ قۇقىعىنان ايىرۋعا ۇكىم شىعاردى.