ماڭعىستاۋ وبلىسىندا پوليسيا قىزمەتكەرلەرى ەسىرتكىنى زاڭسىز ساقتاۋعا كۇدىكتى ءۇش ەر ادامدى ۇستادى. ولاردىڭ اۆتوكولىگىن تەكسەرۋ كەزىندە ماريحۋانا جانە ءىرى اقشا سوماسى – 2 ملن تەڭگەدەن استام – تابىلدى، دەپ حابارلايدى infohub.kz سايتى.
وپەراسيانى ماڭعىستاۋ وبلىسى پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى باسقا بولىمشەلەرمەن بىرگە جۇرگىزدى. پوليسيا مالىمەتىنشە، ىشىندە ەسىرتكى تاسىمالدانعان Mercedes-Benz E200 اۆتوكولىگى توقتاتىلعان.
«كولىك قۇرالىن تەكسەرۋ كەزىندە ماريحۋانا دەپ تانىلعان جاسىل ءتۇستى وسىمدىك تەكتەس زاتى بار ەكى پوليمەرلىك وراما جانە 2 035 000 تەڭگە مولشەرىندەگى اقشا تابىلىپ، تاركىلەندى»، – دەپ حابارلادى پوليسيا دەپارتامەنتى.
ۇستالعان ۇشەۋى دە ماڭعىستاۋ وبلىسىنىڭ تۇرعىندارى بولىپ شىقتى. مەديسينالىق كۋالاندىرۋ ولاردىڭ ماريحۋانا قولدانۋ سالدارىنان ەسىرتكىلىك ماس كۇيدە بولعانىن كورسەتتى.
سوت شەشىمىمەن ولاردىڭ ءارقايسىسى اكىمشىلىك جاۋاپكەرشىلىككە تارتىلىپ، 20 تاۋلىككە ارنايى ءقابىلداۋ-بولۋ مەكەمەسىنە ورنالاستىرىلدى. Mercedes-Benz E200 اۆتوكولىگى ارنايى ايىپپۇل تۇراعىنا جىبەرىلدى. ەسىرتكىنىڭ تابىلۋ فاكتىسى بويىنشا سوتقا دەيىنگى تەرگەۋ جۇرگىزىلۋدە.