ماڭعىستاۋ وبلىسىنداعى تاس جولدا موتوسيكلمەن ساياحاتتاعان يسپانيانىڭ ءۇش ازاماتى قيىن جاعدايعا تاپ بولدى. وقيعا رەسپۋبليكالىق ماڭىزى بار شەتپە — بەينەۋ تاس جولىندا بولعان، ءبىر موتوسيكل بۇزىلىپ قالعان. شەتەلدىكتەرگە ماڭعىستاۋ وبلىسى پوليسيا دەپارتامەنتى پاترۋلدىك پوليسيا روتاسىنىڭ قىزمەتكەرلەرى قانات يسماعۇلوۆ پەن قۇرمانعازى بيتيبايەۆ كومەككە كەلدى، دەپ حابارلايدى infohub.kz سايتى.
«ق ر ءىىم جاڭالىقتارى» Telegram-ارناسىندا حابارلانعانداي، تۋريستەر اقتاۋدان وتانىنا قايتىپ بارا جاتقان. جولدا ءبىر موتوسيكل ىستەن شىعىپ، ەكى ساياحاتشى پوليسەيلەردەن كومەك سۇراعان. ءتارتىپ ساقشىلارى جۇك كولىگىن توقتاتىپ، جۇرگىزۋشىدەن اقاۋلى موتوسيكلدى بەينەۋگە دەيىن جەتكىزۋدى وتىنگەن. جۇرگىزۋشى كومەكتەسۋگە كەلىسىپ، موتوسيكل كولىككە تيەلگەن.
پوليسەيلەر تۋريستەرمەن اعىلشىن تىلىندە ەركىن سويلەسىپ، قاجەتتى قولداۋ كورسەتكەن. شەتەلدىك ازاماتتار كورسەتىلگەن كومەك ءۇشىن العىس ءبىلدىرىپ، پوليسيا قىزمەتكەرلەرىنە ريزاشىلىعىن جەتكىزگەن، دەلىنگەن ۆەدومستۆو حابارلاماسىندا.