قازاقستاندىق جەڭىلىس بىلمەگەن بوكسشى مەيىرىم نۇرسۇلتانوۆ پەن WBCء-نىڭ ورتا سالماقتاعى ۋاقىتشا چەمپيونى حەسۋس راموس اراسىنداعى 20 قىركۇيەككە جوسپارلانعان تيتۋلدىق جەكپە-جەك وتپەيتىن بولدى. امەريكاندىق سپورتشىنىڭ جەكپە-جەك قارساڭىندا دەنساۋلىعى كۇرت ناشارلاعان – وسى سەبەپتەن كەزدەسۋ توقتاتىلدى، دەپ حابارلايدى infohub.kz سايتى.
BoxingScene اقپاراتىنشا، راموس تاعامنان ۋلانىپ قالعان. بەيسەنبى كۇنى كەشكە بوكسشى ءوزىن ناشار سەزىنىپ، سان-ديەگوداعى اۋرۋحانالاردىڭ بىرىنە جەتكىزىلگەن. جۇما كۇنى تاڭەرتەڭ ول اۋرۋحانادان شىعارىلدى، الايدا نۇرسۇلتانوۆپەن جەكپە-جەك ولشەۋ ءراسىمىنىڭ ءدال الدىندا كاردتان الىنىپ تاستالدى.
Premier Boxing Champions جەكپە-جەكتىڭ باسقا كۇنگە اۋىستىرىلاتىنىن راستادى. كەزدەسۋدىڭ جاڭا مەرزىمى ازىرگە جاريالانعان جوق.
نۇرسۇلتانوۆ ءۇش جىلعا جۋىق ۋاقىتتان كەيىنگى العاشقى جەكپە-جەگىن وتكىزۋى ءتيىس ەدى. قازاقستاندىق بوكسشى سوڭعى رەت 2023 جىلدىڭ قاراشاسىندا رينگكە شىعىپ، تورەشىلەردىڭ ءبىراۋىزدان شەشىمىمەن چيليلىك حۋليو الاموسستى جەڭگەن بولاتىن. كاسىبي رينگتە 33 جاستاعى بوكسشى ءالى جەڭىلىس كورمەگەن – 20 جەڭىسى بار، ونىڭ 11ء-ى نوكاۋتپەن اياقتالعان.
راموسپەن جەكپە-جەك نۇرسۇلتانوۆ ءۇشىن الەمدىك تيتۋلدى جەڭىپ الۋدىڭ العاشقى مۇمكىندىگى بولۋى ءتيىس ەدى. امەريكاندىققا تيەسىلى WBCء-نىڭ ورتا سالماقتاعى ۋاقىتشا چەمپيون بەلبەۋى ساراپقا سالىنعالى وتىرعان. WBC بۇعان دەيىن وسى كەزدەسۋدىڭ جەڭىمپازى ۇيىمنىڭ تولىققاندى چەمپيونى كارلوس ادامەسپەن جەكپە-جەك وتكىزۋ قۇقىعىنا يە بولاتىنىن راستاعان.
راموس اۋىستىرىلعان جەكپە-جەككە 24 جەڭىس پەن ءبىر جەڭىلىس رەكوردىمەن كەلە جاتىر، 19 جەكپە-جەگىن مەرزىمىنەن بۇرىن اياقتاعان. امەريكالىق WBCء-نىڭ ۋاقىتشا بەلبەۋىن 2025 جىلدىڭ جەلتوقسانىندا شەين موزلي-كىشىنى تورەشىلەردىڭ ءبىراۋىزدان شەشىمىمەن جەڭىپ الىپ ەدى.