قازاقستان بوكس فەدەراسياسىنىڭ ۆيسە-پرەزيدەنتى مەرەي اقشالوۆ الماتى اۋەجايىنداعى كەزەكتى جانجالعا تاپ بولعان 2016 جىلعى وليمپيادا چەمپيونى دانيار ەلەۋسىنوۆتى جاريا تۇردە قولدادى، دەپ حابارلايدى infohub.kz سايتى.
اقشالوۆ ءوز ۇستانىمىن Instagram پاراقشاسىنداعى جازباسىندا ءبىلدىردى. ول 2016 جىلعى وليمپيادا ويىندارى چەمپيونىنىڭ ومىرىندەگى ءبىرقاتار جانجالدى وقيعالارعا قاراماستان، ەلەۋسىنوۆكە دەگەن سەنىمىن جالعاستىراتىنىن اتاپ ءوتتى. قازاقستان بوكس فەدەراسياسى ۆيسە-پرەزيدەنتىنىڭ ايتۋىنشا، ومىردە دە، سپورتتا دا زاڭ مەن ءتارتىپ تالاپتارى ەلدەگى ءاربىر ازامات ءۇشىن بىردەي جانە تەڭ.
«ءبىراق ءقازىر مەن قيىن جاعدايعا تاپ بولعان اعام دانيار ەلەۋسىنوۆكە قولداۋ بىلدىرگىم كەلەدى. دانيار — وليمپيادا چەمپيونى، ەلىمىزدىڭ تۋىن بىرنەشە رەت كوتەرگەن ەڭبەك سىڭىرگەن سپورتشى. بارلىعىمىز ادامبىز، ومىردە قاتەلەسۋىمىز مۇمكىن. ەڭ باستىسى — ءوز قاتەلىكتەرىڭنەن دۇرىس قورىتىندى جاساۋ. مەن دانيارعا سەنەمىن. وعان وسى قيىن كەزەڭنەن لايىقتى ءوتىپ، ەلىمىزدىڭ سپورتىن دامىتۋعا ۇلەس قوسۋىن جالعاستىرۋىن تىلەيمىن»، — دەپ جازدى اقشالوۆ.
بۇعان دەيىن الماتى اۋەجايىندا جولاۋشىنىڭ الماتى — استانا رەيسىندە دۇربەلەڭ تۋدىرعانى حابارلانعان. ب ا ق وقيعا ورنىنان بەينەجازبا جاريالادى، ال قولدا بار دەرەكتەرگە سايكەس، ول جولاۋشى دانيار ەلەۋسىنوۆ بولىپ شىقتى.
ودان بۇرىن، شىلدە ايىنىڭ باسىندا ەلەۋسىنوۆ قاماۋعا الىنىپ، جۇرگىزۋشى كۋالىگىنەن ايىرىلعان. استانا پوليسياسى ونىڭ جكو-دان كەيىنگى ۇستالۋ بارىسىن دا كورسەتتى. وسى وقيعالاردان كەيىن ەلەۋسىنوۆ العاش رەت الكوگولگە قاتىستى ماسەلەلەرى تۋرالى اشىق مالىمدەپ، جانكۇيەرلەرىنە جۇگىندى.