بيلىك وكىلدەرىنىڭ مالىمەتىنشە، سەيسەنبىدە مەكسيكادان 100-گە جۋىق ءورت ءسوندىرۋشى كانادانىڭ باتىسىنداعى وكاناگان كولىنىڭ ماڭىنداعى ورمان ءورتىن سوندىرۋگە كومەكتەسۋ ءۇشىن كەلەدى دەپ كۇتىلۋدە. بۇل ءورت 20 مىڭ ادامدى ەۆاكۋاسيالاۋعا ءماجبۇر ەتىپ، ۇيلەر مەن باسقا دا م ۇلىكتەردى جويدى.
اۋماعى 156 شارشى شاقىرىمدى قۇرايتىن ءورت 80 جاستاعى ايەلدىڭ ءومىرىن قيىپ، ۆانكۋۆەردەن شامامەن 300 شاقىرىم شىعىستا ورنالاسقان 12 مىڭ تۇرعىنى بار ساممەرلەند قالاشىعىنا قاراي جىلجۋدا.
بريتاندىق كولۋمبيا ءورت ءسوندىرۋ قىزمەتىنىڭ وكىلى حيۋ مەردوكتىڭ ايتۋىنشا، تىك بەتكەيلەر مەن ىستىق اۋا رايى جاعدايىندا ءورت سوندىرۋشىلەردىڭ الدىندا «وراسان زور مىندەت» تۇر، ويتكەنى جانعان شوقتار نەگىزگى ءورت شەبىنەن تىس جەرلەردە جاڭا ورتتەر تۋدىرىپ، تىكەلەي كۇرەسۋ مۇمكىندىگىن شەكتەيدى.
كانادا كورولدىك اتتى پوليسياسى جۇما كۇنى باستالعان ءورتتىڭ سەبەبىنە قاتىستى قىلمىستىق ءىس قوزعادى. بيلىك وكىلدەرىنىڭ ايتۋىنشا، ايەل ساممەرلەندتىڭ باتىسىنداعى مەدوۋ ۆەلليدە قاشىپ قۇتىلۋعا تىرىسىپ قايتىس بولعان.
ءورت كوپتەگەن ۇيلەردى جويدى، ءبىراق بيلىك وكىلدەرى ءقاۋىپتى جاعدايعا بايلانىستى شىعىندى باعالاۋ جۇمىستارىن جۇرگىزۋ مۇمكىن ەمەس ەكەنىن ايتتى. ساممەرلەند مەرى دۋگ حولمس دۇيسەنبىدە قالانىڭ 12 مىڭعا جۋىق تۇرعىنى جاقىن ارادا ۇيلەرىنە ورالا المايتىنىن ەسكەرتتى. «ءبىز نە بار، نە جوق ەكەنىنە دايىن بولۋىمىز كەرەك»، — دەدى حولمس بريفينگتە داۋىسى دىرىلدەپ. «بۇل قيىن بولادى. وتە قيىن بولادى. ءبارىمىز ۇيىنەن ايىرىلعان ادامداردى بىلەمىز. ال ول ادامدار ءبىزدىڭ كومەگىمىزگە مۇقتاج».
بريتاندىق كولۋمبيادا 100-گە جۋىق ورمان ءورتى تىركەلىپ، ولاردىڭ جارتىسىنا جۋىعى باقىلاۋدان شىققان. بريتاندىق كولۋمبيا ءورت ءسوندىرۋ قىزمەتى پروۆينسيانىڭ ورتالىق ىشكى ايماقتارى مەن وكاناگان اۋدانىندا نايزاعايدان بولاتىن جاڭا ورتتەردىڭ جوعارى ءقاۋپى تۋرالى ەسكەرتتى.