قازاقستاندا ميكروقارجى ۇيىمى ليسەنزياسىنان ايىرىلسا، بەرگەن كرەديتتەرى اۆتوماتتى تۇردە ەسەپتەن شىعارىلمايدى. بۇل جاعدايدا قارىز الۋشىلار قارىزىن قالاي وتەۋى كەرەك؟ infohub.kz سايتى حابارلايدى.
ميكروقارجى ۇيىمى قىزمەتىن جۇرگىزۋگە ليسەنزياسىنان ايىرىلعان جاعدايلار بولادى. الايدا قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگىنىڭ مالىمەتىنشە، ميكروقارجى ۇيىمىنىڭ تاراتىلۋى نەمەسە بانكروتتىعى بەرىلگەن كرەديتتەردىڭ اۆتوماتتى تۇردە ەسەپتەن شىعارىلۋىن بىلدىرمەيدى.
بانكتەردەگىدەي، قارىز الۋشىلار الىنعان اقشانى قايتارىپ، سىياقىنى تولەۋگە مىندەتتى.
وتەۋ ءتارتىبى تالاپ ەتۋ قۇقىعىنىڭ باسقا كرەديتورعا بەرىلگەن-بەرىلمەگەنىنە بايلانىستى.
ەگەر تالاپ ەتۋ قۇقىعى بەرىلمەسە، قارىز الۋشى شارت تالاپتارىنا جانە وندا كورسەتىلگەن دەرەكتەمەلەرگە سايكەس قارىزىن تولەۋدى جالعاستىرادى.
ەگەر بەرەشەك باسقا قارجى ۇيىمىنا نەمەسە كوللەكتورلىق اگەنتتىككە بەرىلىپ، تولەم دەرەكتەمەلەرى وزگەرسە، قارىز الۋشىعا كرەديتوردىڭ اۋىسقانى جانە قارىزدى وتەۋ ءتارتىبى تۋرالى ءتيىستى تۇردە حابارلاۋ قاجەت.
قيىندىقتارعا تاپ بولماس ءۇشىن ميكروقارجى ۇيىمىنىڭ جابىلعانى نەمەسە ليسەنزياسىنىڭ قايتارىپ الىنعانى تۋرالى اقپاراتقا بايلانىستى تولەمدى توقتاتۋعا بولمايدى. تولەم جاساماس بۇرىن تالاپ ەتۋ قۇقىعى كىمگە تيەسىلى ەكەنىن جانە قانداي دەرەكتەمەلەردىڭ وزەكتى ەكەنىن تەكسەرۋ قاجەت.
ميكروقارجى ۇيىمىنىڭ ليسەنزياسى زاڭنامانى جۇيەلى تۇردە بۇزعانى، سونداي-اق پرۋدەنسيالدىق جانە باسقا دا نورماتيۆتەردى ساقتاماعانى ءۇشىن توقتاتىلۋى نەمەسە قايتارىپ الىنۋى مۇمكىن.
2026 جىلعى 1 قىركۇيەكتەگى جاعداي بويىنشا قازاقستاندا 217 ميكروقارجى ۇيىمى جۇمىس ىستەگەن. جىل باسىنان بەرى 8 ميكروقارجى ۇيىمىنىڭ ليسەنزياسى قايتارىپ الىنىپ، تاعى ەكەۋىنىڭ ليسەنزياسىنىڭ قولدانىلۋى توقتاتىلدى.
سوندىقتان ميكروكرەديت راسىمدەۋ الدىندا ۇيىمنىڭ ميكروقارجىلىق قىزمەتتى جۇزەگە اسىرۋعا جارامدى ليسەنزياسى بار ەكەنىنە كوز جەتكىزۋ قاجەت. ونىڭ بار-جوعىن رەسمي تىزىلىمنەن تەكسەرۋگە بولادى.
سونداي-اق، ميكروقارجى ۇيىمىمەن ماسەلەلەر، داۋلار نەمەسە جانجالدار تۋىنداعان جاعدايدا قازاقستاندىقتار ميكروقارجى ومبۋدسمانىنا كومەك سۇراپ جۇگىنە الادى. ونىڭ قىزمەتتەرى ازاماتتار ءۇشىن تەگىن، ال شەشىمدەرى ورىندالۋعا مىندەتتى.
ال بۇعان دەيىن ءبىز كرەديت بەرگەن بانك ليسەنزياسىنان ايىرىلسا، بۇكىل كرەديتتى بىردەن جابۋ كەرەك پە دەگەن سۇراققا جاۋاپ بەرگەن بولاتىنبىز.