قازاقستاننىڭ باس پروكۋرورى بەرىك اسىلوۆ ەلدەگى الاياقتىقپەن جانە باسقا دا قۇقىق بۇزۋشىلىقتارمەن كەڭ اۋقىمدى كۇرەس تۋرالى ايتىپ بەردى، دەپ حابارلايدى infohub.kz سايتى.
الەۋمەتتىك جەلىدە جاريالانعان ۇندەۋىندە اسىلوۆ جاڭا كونستيتۋسيا قابىلدانعاننان كەيىن جۇرگىزىلىپ جاتقان اۋقىمدى قۇقىقتىق رەفورما جاعدايىندا قۇقىق قورعاۋ ورگاندارىنىڭ جۇمىس تاسىلدەرى وزگەرىپ جاتقانىن اتاپ ءوتتى. «بۇگىن جاسالعان قىلمىسقا عانا ارەكەت ەتۋ جەتكىلىكسىز. ءبىزدىڭ ورتاق مىندەتىمىز – قاۋىپ-قاتەرلەردىڭ الدىن الۋ، قۇقىق بۇزۋشىلىقتاردىڭ سەبەپتەرىن جويۋ جانە ازاماتتاردىڭ قۇقىقتارىن ناقتى قورعاۋدى قامتاماسىز ەتۋ»، – دەپ اتاپ كورسەتتى ول.
وسى ماقساتتا قىلمىستىق قاۋىپ-قاتەرلەر مەن قوعامدىق قاۋىپسىزدىك تاۋەكەلدەرىن بولجاۋ ورتالىعى قۇرىلدى. ول تاۋلىك بويى كريمينوگەندىك جاعدايدى تالداپ، الەۋەتتى قاۋىپ-قاتەرلەر مەن وسال ايماقتاردى انىقتايدى، تاۋەكەلدەردى بولجايدى جانە ولاردىڭ الدىن الۋ بويىنشا ناقتى شارالار ازىرلەيدى. قىلمىستىق قاۋىپ-قاتەرلەردىڭ جاڭا نىساندارى مەن تاسىلدەرىن انىقتاۋ ءۇشىن شەتەلدىك كونتەنتتى باقىلاۋعا ەرەكشە نازار اۋدارىلادى.
ىشكى ىستەر مينيسترلىگىمەن جانە وڭىرلەردىڭ اكىمدىكتەرىمەن بىرلەسىپ، جاساندى ينتەللەكت پەن ۇشقىشسىز تەحنولوگيالاردى قولدانا وتىرىپ، ازاماتتارعا قىلمىستىق قول سۇعۋشىلىق ىقتيمالدىعى جوعارى 360-تان استام ءقاۋىپتى ورىن انىقتالدى. بۇل جەرلەردە پوليسيا پاترۋلدەۋىن كۇشەيتىپ، 4 مىڭعا جۋىق جاڭا جارىقتاندىرۋ نۇكتەسى جانە 3،5 مىڭنان استام بەينەباقىلاۋ كامەراسى ورناتىلدى.
مۇنداي ءتاسىل ءقازىردىڭ وزىندە ناتيجە بەرىپ وتىر: ءبىرىنشى جارتىجىلدىقتىڭ قورىتىندىسى بويىنشا ەلدەگى قىلمىس 11 پايىزعا تومەندەدى. كىسى ءولتىرۋ، قاراقشىلىق، توناۋ، بوپسالاۋ، ۇرلىق جانە كوشەدەگى قىلمىستار ازايدى.
ەسىرتكى قىلمىسىنا قارسى شابۋىل جۇمىستارى جالعاسۋدا. «كيبەرقاداعالاۋ» جۇيەسى ەسىرتكى ناسيحاتتايتىن 10 مىڭ ماتەريالدى، ونىڭ ىشىندە 6 مىڭنان استام ەسىرتكى دۇكەنىن بۇعاتتادى. پروكۋراتۋرا مەن پوليسيا ورگاندارىنىڭ ءوزارا ءىس-قيمىلى ناتيجەسىندە 464 مىڭنان استام دروپپەر شوتى بۇعاتتالىپ، 2،6 ميلليارد تەڭگەدەن استام ەسىرتكى تابىسى تاركىلەندى.
سوڭعى جىلدارى العاش رەت ينتەرنەت-الاياقتىقتىڭ ءوسۋ ءۇردىسىن بۇزۋ مۇمكىن بولدى – ولاردىڭ سانى 9 پايىزعا تومەندەدى. قۇقىق قورعاۋ ورگاندارى مەن بايلانىس وپەراتورىنىڭ بىرلەسكەن كۇش-جىگەرىمەن ميلليوننان استام كۇدىكتى قوڭىراۋ توقتاتىلىپ، 12 شەتەلدىك الاياقتىق كولل-ورتالىقتىڭ قىزمەتى جويىلدى.
استانادا پروكۋراتۋرانىڭ باستاماسىمەن بايلانىس وپەراتورىنىڭ بازاسىندا قۇرىلعان انتيكولل-ورتالىق 76 جاستاعى ايەل الاياقتارعا 21 ميلليون تەڭگە بەرۋگە دايىندالىپ جاتقان كەزدە ولاردىڭ قوڭىراۋىن توقتاتتى. اقشا ساقتالىپ قالدى. سونىمەن قاتار، ۇلتتىق بانكتىڭ انتيفرود-ورتالىعىنىڭ ارقاسىندا 2،9 ميلليارد تەڭگەدەن استام سوماعا الاياقتىق ترانزاكسيالار بۇعاتتالدى.