2026 جىلدىڭ سوڭىنا دەيىن ەرەكشە قاجەتتىلىكتەرى بار بالالاردى ءۇي جاعدايىندا وڭالتۋ پيلوتتىق جوباسى قازاقستاننىڭ تاعى ءتورت ءوڭىرىن قامتيدى. ءقازىر ول شىمكەنتتە، قىزىلوردا، پاۆلودار وبلىستارىندا جانە اباي وبلىسىندا جۇمىس ىستەپ تۇر، دەپ حابارلايدى infohub.kz سايتى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، بۇگىندە وسى وڭىرلەردە 642 بالا ۇيدە كەشەندى وڭالتۋدان ءوتىپ جاتىر، ولاردىڭ 500-ىندە وڭ ديناميكا بايقالعان.
«QH مۇگەدەك بالالاردى ۇيدە وڭالتۋ» جوباسى تاعى ءتورت وڭىرگە كەڭەيتىلەتىنى حابارلاندى، الايدا ناقتى قانداي وبلىستار ەكەنى ايتىلمادى.
ەسكە سالايىق، مۇگەدەك بالالاردى ۇيدە وڭالتۋ ەلدىڭ ءتورت وڭىرىندە 2024 جىلى ەنگىزىلگەن بولاتىن. باس ماقسات – بالانىڭ ۇيدەگى ادەتتەگى جاعدايدا، مامانداردىڭ سۇيەمەلدەۋىمەن قاجەتتى وڭالتۋ كۋرسىنان ءوتۋى.
بارلىعى قالاي ۇيىمداستىرىلعان: جوبا اياسىندا الدىمەن ماماندار بالالاردىڭ جاعدايىن، ولاردىڭ جەكە قاجەتتىلىكتەرىن، سونداي-اق تۇرمىس جاعدايىن باعالايدى. سودان كەيىن بەيىمدەلگىش كرەسلولار، ۆەرتيكاليزاتورلار، حودۋنكي جانە ءارتۇرلى جاتتىعۋ قۇرىلعىلارى بولۋى مۇمكىن تەحنيكالىق وڭالتۋ قۇرالدارى تاڭدالادى. بارلىق قاجەتتى جابدىقتى بالانىڭ ۇيىنە تىكەلەي جەتكىزىپ، ۋاقىتشا پايدالانۋعا بەرەدى.
«اتا-انالارعا تەحنيكالىق قۇرالداردى ءقاۋىپسىز پايدالانۋعا جانە قاجەتتى جاتتىعۋلاردى ورىنداۋعا ۇيرەتەدى. كۋرستىڭ ۇزاقتىعى مەن مازمۇنى ءار جاعدايدا جەكە انىقتالادى»، – دەلىنگەن حابارلامادا.
جوبانىڭ ناتيجەلەرى قانداي: كىشكەنتاي پاسيەنتتەردەگى وڭ ديناميكا ناقتى وزگەرىستەر بويىنشا باعالاناتىنى اتاپ وتىلەدى. ول ءۇشىن بارتەل، FIM جانە ۋنودن شكالالارى قولدانىلادى. سونىمەن قاتار، بالانىڭ باسىن جاقسى ۇستاۋدى ۇيرەنگەنى، وزدىگىنەن وتىرۋى نەمەسە تۇرۋى، اياققا تۇرۋى، ءجۇرۋ داعدىلارىنىڭ جاقسارعانى ەسكەرىلەدى.
ەڭبەك مينيسترلىگىندە جوبا باستالعالى 138 بالا باسىن جاقسى ۇستاي باستاعانىن، 83ء-ى وزدىگىنەن وتىراتىنىن، 49-ى قولداۋمەن جۇرەتىنىن، تاعى 35 بالا وزدىگىنەن جۇرە باستاعانىن اتاپ ءوتتى.