NASA استرونومدارى ساتۋرننىڭ وڭتۇستىك پوليۋسىندەگى اتموسفەرادا الىپ ونبۇرىشتى قۇرىلىمدى تىركەدى، دەپ حابارلايدى infohub.kz سايتى.
«حاببل» عارىشتىق تەلەسكوبى ساتۋرننىڭ وڭتۇستىك ءپوليۋسى ماڭىنان ونبۇرىش ءپىشىندى جاڭا اتموسفەرالىق ءتۇزىلىمدى انىقتادى. NASA-نىڭ گوددارد اتىنداعى عارىشتىق ۇشۋ ورتالىعى مەن باسكتار ەلى ۋنيۆەرسيتەتىنىڭ عالىمدارى سۋرەتتەردى زەرتتەپ، بۇرىن بايقالماعان الىپ اتموسفەرالىق تولقىننىڭ بار ەكەنىن راستادى. سولتۇستىكتەگى ايگىلى التىبۇرىشتان (ول 40 جىلدان استام ۋاقىت بويى بەلگىلى) ايىرماشىلىعى، ونبۇرىش جاقىندا عانا پايدا بولعان. زەرتتەۋ ناتيجەلەرى Science Advances عىلىمي جۋرنالىندا جاريالاندى.
تولقىندى جولاقتىڭ العاشقى بەلگىلەرىن اۋەسقوي استرونومدار ترەۆور بەرري مەن جان-پول وجە 2024 جىلى OPAL جوباسىنىڭ دەرەكتەرىن تالداۋ كەزىندە بايقادى. كەيىن «حاببلدىڭ» 2025 جىلعى سۋرەتتەرى قۇرىلىمنىڭ ايقىن ونبۇرىشقا اينالعانىن راستادى. زەرتتەۋ جەتەكشىسى، باسكتار ەلى ۋنيۆەرسيتەتىنىڭ عالىمى اگۋستين سانچەس-لاۆەگا عالىمدار 1990 جىلدان بەرى سولتۇستىك التىبۇرىشتىڭ انالوگىن ىزدەگەنىن، ءبىراق «كاسسيني» قوسا العاندا، ەشبىر اپپارات مۇندايدى تىركەمەگەنىن اتاپ ءوتتى.
سۋرەتتەر تولقىننىڭ اعىندى اعىس ىشىندە ورنالاسىپ، اتموسفەرانىڭ بىرنەشە قاباتىن قامتي وتىرىپ، ونىڭ تەرەڭىنە ەنەتىنىن كورسەتتى. NASA زەرتتەۋشىسى ەمي سايمون باستى جۇمباق — قۇرىلىمنىڭ سوڭعى بىرنەشە جىلدا كەنەتتەن پايدا بولۋ سەبەپتەرى ەكەنىن اتاپ ءوتتى. عالىمدار دەكاگوننىڭ تۇراقتى وبەكت بولىپ قالا ما، الدە ۋاقىت وتە جوعالىپ كەتە مە، سونى انىقتاۋ ءۇشىن «دجەيمس ۋەبب» تەلەسكوبىمەن باقىلاۋدى جالعاستىرۋدى جوسپارلاپ وتىر.