بوكستان ءۇش دۇركىن الەم چەمپيونى نازىم قىزايباي ازيادا-2026-دا العاشقى كەدەرگىدەن اسا المادى: 54 كگ سالماق دارەجەسىندە 1/8 فينالدا تورەشىلەردىڭ بولەك شەشىمىمەن جۇڭگو وكىلى چجاو سيۋانعا 1:4 ەسەبىمەن جەڭىلىپ قالدى، دەپ حابارلايدى infohub.kz سايتى.
جەكپە-جەك قازاقستاندىق سپورتشىنىڭ پايداسىنا شەشىلمەدى. باستاپقى راۋند قىتايلىق قارسىلاستىڭ ەنشىسىندە قالدى — تورەشىلەردىڭ جازباسى بويىنشا 4:1. ەكىنشى كەزەڭدە چجاو سيۋاننىڭ باسىمدىعى ماردىمسىز بولدى — 3:2، ال سوڭعى ءۇش مينۋتتى بەس تورەشى دە ءبىراۋىزدان جۇڭگو وكىلىنە بەردى.
قىزايباي ءۇشىن بۇل ازيا ويىندارىنداعى ەكىنشى ونەر كورسەتۋى: وتكەن 2022 جىلعى حانچجوۋ ويىندارىندا ول شيرەك فينال ساتىسىندا كۇرەستى اياقتاعان ەدى. سونىمەن قاتار قازاقستاندىق سپورتشىنىڭ قورجىنىندا 2024 جىلعى وليمپيادانىڭ قولا مەدالى جانە ءۇش الەم چەمپيونى اتاعى بار — ول الەم بىرىنشىلىكتەرىندە 2014، 2016 جانە 2025 جىلدارى جەڭىسكە جەتكەن.
ال قازاقستاننىڭ تاعى ءبىر وكىلى جۇلدە ءۇشىن كۇرەسىن جالعاستىرۋدا. كۇنى كەشە الۋا بالكيبەكوۆا 51 كگ دارەجەسىندە ءۇندىستاندىق ساكشي ءچاۋدحاريدى ۇتىپ، شيرەك فينالعا شىقتى. جارتىلاي فينالعا جولداما ءۇشىن ول 28 قىركۇيەكتە جاپوندىق يۋنا نيشيناكامەن جەكپە-جەككە شىعادى.
جاپونياداعى XX جازعى ازيا ويىندارى 19 قىركۇيەكتە رەسمي تۇردە اشىلدى. جارىسقا 45 ەلدىڭ سپورتشىلارى قاتىسىپ، 460 مەدال جيىنتىعىن ساراپقا سالۋدا. ازيادا-2026-دا قازاقستان قۇراماسىنىڭ ساپىندا 35 سپورت تۇرىنەن 558 سپورتشى ونەر كورسەتۋدە.