اقش-تىڭ ۇلتتىق باسكەتبول قاۋىمداستىعى (نبا) ءوز تاريحىنداعى ەڭ ءىرى جازالاردىڭ ءبىرىن لوس-اندجەلەس «كليپپەرس» كلۋبىنا قولداندى. بۇل — كاۆاي لەوناردتى ەركىن اگەنت رەتىندە تارتۋ كەزىندە جالاقى تولەۋ ەرەجەلەرىن اينالىپ ءوتۋ ارەكەتىنىڭ سالدارى، دەپ حابارلايدى infohub.kz سايتى.
ليگا كلۋبتى بەس ءبىرىنشى اينالىم درافت-پيگىنەن ايىردى. ناتيجەسىندە، 2029-2033 جىلدار ارالىعىندا كوماندادا تابيعي تاڭداۋ قۇقىعى بولمايدى. سونىمەن قاتار، «كليپپەرس» 30 ميلليون دوللار ايىپپۇل تولەيدى، ال كلۋب يەسى ستيۆ باللمەر ءبىر جىلعا ليگا مەن كوماندانىڭ بارلىق ءىس-شارالارىنان شەتتەتىلدى. باسكەتبول وپەراسيالارىنىڭ پرەزيدەنتى لوۋرەنس فرەنك التى ايعا، ال بيزنەس-وپەراسيالار پرەزيدەنتى دجيلليان سۋكەر ءبىر جىلعا جالاقىسىز جۇمىستان قالدىرىلدى.
لەوناردتىڭ وزىنە 700 مىڭ دوللار ايىپپۇل سالىندى. ايتا كەتەيىك، ول بيىلعى ماۋسىمدا 50 ميلليون دوللار جالاقى الادى. ال Forbes مالىمەتىنشە، Microsoft كورپوراسياسىنىڭ بۇرىنعى باس ديرەكتورى باللمەردىڭ بايلىعى 152،7 ميلليارد دوللاردى قۇرايدى.
نبا كوميسسارى ادام سيلۆەر مالىمدەمەسىندە: «ويىنشىلاردىڭ جالاقىسىن انىقتايتىن ۇجىمدىق كەلىسىم جۇيەسى — ليگانىڭ باسكەتبول باسەكەلەستىگىنىڭ نەگىزگى قۇرامداس بولىگى. ءبىزدىڭ ەرەجەلەرىمىزدى ورەسكەل بۇزۋ جانە «كليپپەرستىڭ» وسى قۇقىقبۇزۋشىلىققا اكەلگەن جۇيەلىك جانە باسشىلىق قاتەلىكتەرى مەنى قاتتى رەنجىتتى. جازانىڭ اۋىرلىعى بۇزۋشىلىقتاردىڭ ماڭىزدىلىعىن كورسەتەدى»، — دەدى.
لەونارد ءوز اگەنتى ارقىلى تاراتقان مالىمدەمەسىندە: «مەن جاقىن ورتامداعى ادامداردىڭ قاتە شەشىمدەرى ءۇشىن تولىق جاۋاپكەرشىلىكتى ءوز موينىما الامىن جانە بۇل جاعدايدىڭ جانكۇيەرلەر مەن وتباسىما كەلتىرگەن قولايسىزدىعىنا وكىنەمىن. «كليپپەرسپەن» كەلىسىمشارتقا وتىرعاندا مەن ادال نيەتپەن، بارلىق مىندەتتەمەلەرىمدى ورىنداۋعا دايىن بولدىم جانە ەشكىمنىڭ جالاقى تولەۋ ەرەجەلەرىن اينالىپ ءوتۋ نيەتى تۋرالى بىلمەدىم»، — دەدى.