نورۆەگيا كورولى حارالد Vء-نىڭ دەنساۋلىعى ناشارلاعانىن ساراي مالىمدەدى. ول قانداعى باكتەريالىق ينفەكسياعا قارسى انتيبيوتيكتەر قابىلداپ، اۋرۋحانادا جاتىر. جاعدايىنىڭ ناشارلاعانىنا قاراماستان، مونارح ەمگە جاۋاپ بەرىپ وتىر، دەپ حابارلادى ساراي. الايدا ول وسلو ۋنيۆەرسيتەتىنىڭ اۋرۋحاناسىندا (ريكشوسپيتالدا) قالىپ، كەلەسى حابارلانعانعا دەيىن كورولدىك مىندەتتەرىنەن بوساتىلادى.
1991 جىلدان بەرى تاقتا وتىرعان 89 جاستاعى كورول ءبىر اپتا بۇرىن اۋرۋحاناعا جات قىزىلىپ، ەڭبەك دەمالىسىنا شىققان بولاتىن. ونىڭ 53 جاستاعى ۇلى، تاق مۇراگەرى حانزادا حوكون اكەسى دەمالىستا جۇرگەندە رەگەنت قىزمەتىن اتقارىپ ءجۇر.
كورول حارالد سوڭعى اپتالاردا گەموليتيكالىق انەميا دەگەن سيرەك كەزدەسەتىن قان اۋرۋىنا كورتيزون قابىلداپ ەمدەلدى. بۇل اۋرۋ اعزاداعى قىزىل قان جاسۋشالارىنىڭ سانىن ازايتىپ، شارشاۋ مەن ەنتىگۋدى تۋدىرادى.
2024 جىلدىڭ ساۋىرىندە نورۆەگيا كورولدىك ءۇيى كورول حارالد «جاسىن ەسكەرە وتىرىپ»، ونىڭ قوعامدىق ءىس-شارالارىنا «تۇراقتى قىسقارتۋ» جاسايتىنىن مالىمدەگەن ەدى. سول جىلى كورول مالايزياداعى دەمالىسىندا اۋىرىپ قالعان سوڭ، جۇرەگىنە كارديوستيمۋلياتور ورناتىلعان بولاتىن.
نورۆەگيا كورولدىك وتباسى 2026 جىلى قيىن جىلدى باستان وتكەرىپ جاتىر. تاق مۇراگەرى حانزادا حوكوننىڭ ايەلى، حانشايىم مەتتە-ماريت 2018 جىلى وكپەنىڭ سيرەك كەزدەسەتىن فيبروزى دياگنوزى قويىلعاننان كەيىن، ماۋسىم ايىندا وكپە ترانسپلانتاسياسىن الدى.
ترانسپلانتاسيا مەتتە-ماريتتىڭ ۇلى ماريۋس بورگ ءحويبي ەكى زورلاۋ فاكتىسى بويىنشا كىنالى دەپ تانىلىپ، ءتورت جىلعا باس بوستاندىعىنان ايىرىلعانىنا ەكى كۇن بولعان سوڭ جاسالدى. ول ەڭ اۋىر ايىپتاۋلاردى جوققا شىعارعان ەدى، ال ونىڭ ادۆوكاتتارى ۇكىمگە شاعىم تۇسىرەتىندەرىن مالىمدەدى.
29 جاستاعى ءحويبي اناسى حانزادا حوكونعا تۇرمىسقا شىققاندا ءتورت جاستا ەدى جانە ونىڭ ءوزى كورولدىك تۇلعا ەمەس. سونداي-اق، جىل باسىندا مەتتە-ماريتتىڭ قايتىس بولعان سەكسۋالدىق قىلمىسكەر دجەففري ەپشتەينمەن ءجيى بايلانىستا بولعانىن كورسەتەتىن قۇجاتتار جاريالاندى. كەيىن ول ەپشتەينمەن ءۇش جىلدىق دوستىعى ءۇشىن نورۆەگيا كورولى مەن حانشايىمىنان كەشىرىم سۇراپ، «قاتە شەشىم» قابىلداعانىن مويىندادى جانە ۇلتتىق تەلەارناعا بەرگەن سۇحباتىندا ونىمەن ەشقاشان كەزدەسپەگەنىن قالايتىنىن ايتتى.