پاۆلوداردا ءۇش جىلعا سوزىلعان رەكونسترۋكسيادان كەيىن 1956 جىلدان بەرى جۇمىس ىستەپ كەلە جاتقان №1 قالالىق اۋرۋحانا قايتا اشىلدى. وڭىردەگى ەڭ ءىرى مەديسينالىق ورتالىقتى جاڭارتۋعا 12،3 ملرد تەڭگە جۇمسالدى، دەپ حابارلايدى infohub.kz سايتى.
پاۆلودار وبلىسى اكىمدىگىنىڭ مالىمەتىنشە، 70 جىلدىق تاريحى بار بۇل ەمدەۋ مەكەمەسى ونداعان جىلدار بويى كۇردەلى جوندەۋ كورمەگەن. جۇمىس 2022 جىلى باستالعان.
«اۋرۋحانا كەشەنىنىڭ جالپى اۋدانى 21 مىڭ شارشى مەتردى قۇرايدى، ونىڭ 13 مىڭ شارشى مەترى رەكونسترۋكسيالاندى. 2020 جىلى ازىرلەنگەن جوبا جەرگىلىكتى جانە رەسپۋبليكالىق بيۋدجەت قاراجاتى ەسەبىنەن جۇزەگە اسىرىلدى. جۇمىستاردىڭ جالپى قۇنى 12،3 ملرد تەڭگەنى قۇرادى، ونىڭ 8،8 ملرد تەڭگەسى مەديسينالىق جابدىق ساتىپ الۋعا جۇمسالدى»، – دەلىنگەن حابارلامادا.
رەكونسترۋكسيا بارىسىندا نەگىزگى ەمدەۋ كورپۋستارىنىڭ قاسبەتتەرى، تەرەزە بلوكتارى مەن ينجەنەرلىك جەلىلەر تولىعىمەن جاڭارتىلدى. ەلەكترمەن جابدىقتاۋ، جىلۋمەن قامتاماسىز ەتۋ، سۋمەن جابدىقتاۋ جانە كارىز، مەديسينالىق گازدار، ءورت دابىلى، تەلەفون جانە جەرگىلىكتى جەلى جۇيەلەرى 100 پايىزعا اۋىستىرىلدى.
پالاتالاردا جەكە سانيتارلىق توراپتار مەن دۋش كابينالارى پايدا بولدى، ال ينفەكسيالىق قاۋىپسىزدىكتى قامتاماسىز ەتۋ ءۇشىن ءار قاباتتا بولەك جەلدەتۋ جۇيەسى ورناتىلدى.
«اۋرۋحانا 1 319 بىرلىك جاڭا مەديسينالىق جابدىق الدى، ونىڭ ىشىندە رەنتگەن قوندىرعىسى، ساراپتامالىق كلاستاعى ۋدز اپپاراتتارى جانە وڭالتۋعا ارنالعان جابدىقتار بار. ەڭ ماڭىزدى ساتىپ الۋلاردىڭ قاتارىندا – 7-بۋىندى انگيوگراف جانە كچپ جابدىعى»، – دەدى اكىمدىكتە.
بۇعان دەيىن پروفيلاكتيكالىق مەديسينا اكادەمياسىنىڭ پرەزيدەنتى الماز شارمان الەمدىك تاجىريبەدە 40–50 جىل پايدالانىلعان مەديسينالىق كورپۋستاردى بۇزۋ ءقاۋىپسىز ەكەنىن تۇسىندىرگەن بولاتىن.