پەتروپاۆلداعى ماعجان جۇمابايەۆ اتىنداعى جوعارى كوللەدجدىڭ جاتاقحاناسىندا تۇراتىن سەگىز ستۋدەنت «دەنە تەرىسىنىڭ دەرماتوفيتياسى» دەگەن الدىن الا دياگنوزبەن اۋرۋحاناعا جات قىزىلدى. بۇل — حالىق اراسىندا تەمىرەتكى دەپ اتالاتىن ساڭىراۋقۇلاق ينفەكسياسى، دەپ حابارلايدى infohub.kz سايتى.
سەگىز ناۋقاس تۋرالى شۇعىل حابارلاما 25 قىركۇيەكتە كوپبەيىندى وبلىستىق اۋرۋحانادان پەتروپاۆل قالالىق سانيتاريالىق-ەپيدەميولوگيالىق باقىلاۋ باسقارماسىنا ءتۇستى.
باسقارمانىڭ ەپيدەميولوگيالىق باقىلاۋ ءبولىمىنىڭ جەتەكشىسى انارا قۇرعانباەۆانىڭ ايتۋىنشا، بارلىق ناۋقاستار جاتاقحانانىڭ ءبىر قاباتىندا تۇرادى. ولاردىڭ بولمەلەرى قاتار ورنالاسقان، ستۋدەنتتەر اراسىندا تىعىز تۇرمىستىق قارىم-قاتىناس بولعان.
قازىرگى تاڭدا دياگنوز ناقتىلانىپ جاتىر. تەرى-ۆەنەرولوگيالىق ديسپانسەردە پاتولوگيالىق ماتەريالعا زەرتحانالىق زەرتتەۋ جۇرگىزىلۋدە.
كوللەدج بەن جاتاقحانادا ەپيدەميولوگيالىق تەرگەۋ ۇيىمداستىرىلدى. ماماندار ينفەكسيا كوزىن جانە ونىڭ تارالۋ جولدارىن انىقتاۋدا.
جاتاقحانادا جانە ناۋقاستاردىڭ تۇرعىلىقتى جەرىندە قورىتىندى دەزينفەكسيا جۇرگىزىلدى. كوللەدجدە دە ەپيدەمياعا قارسى شارالار جوسپارلانعان.
ەمدەۋ اياقتالعان سوڭ دارىگەرلەر ناۋقاستاردى ءبىر اي بويى باقىلايدى. وسى كەزەڭدە ولاردىڭ جاعدايىن تەكسەرۋ ءۇشىن ەكى رەت زەرتحانالىق زەرتتەۋ جۇرگىزىلەدى.
بۇعان دەيىن Kursiv Health قاراعاندىلىق ءۇش ستۋدەنتتەن تۋبەركۋلەز انىقتالعانىن حابارلاعان بولاتىن.