جاڭا iPhone ۇلگىلەرىن ساتىپ العىسى كەلگەن قازاقستاندىقتارعا الاياقتار قاقپان قۇرىپ ءجۇر. سمارتفونداردى جالعان الدىن الا تاپسىرىسقا بايلانىستى ايلا-امالدار تۋرالى اباي وبلىسى پوليسيا دەپارتامەنتى ءمالىم ەتتى، دەپ حابارلايدى infohub.kz سايتى.
ۆەدومستۆونىڭ دەرەگىنشە، الاياقتار Telegram-دا جابىق ارنالار اشىپ، وندا iPhone-دى ساتىلىمنىڭ ءبىرىنشى كۇنى ساتىپ الۋدى ۇسىنا باستاعان. ولاردىڭ قارماعىنا نارىقتاعىدان تومەن باعالار دا ىلىگەدى: ارزان باعانى «كوتەرمە ساتىپ الۋمەن» تۇسىندىرەدى، ال سەنىمدىرەك بولۋ ءۇشىن جالعان جۇكقۇجاتتاردى، قوراپتاردىڭ سۋرەتتەرىن، سونداي-اق «كۋرەرلەرمەن» جانە قويما قىزمەتكەرلەرىمەن بولعان حات الماسۋدى كورسەتەدى.
«ساتىپ الۋشىلارعا جەكە تۇلعانىڭ كارتاسىنا الدىن الا تولەم جاساۋدى نەمەسە كريپتوۆاليۋتامەن ەسەپ ايىرىسۋدى ۇسىنادى. اقشانى الىپ، الاياقتار ارنانى جويادى، كليەنتتى بۇعاتتايدى دا، بايلانىسقا شىقپاي قويادى»، — دەپ ەسكەرتتى پوليسيادا.
قازاقستاندىقتارعا تىم ءتيىمدى ۇسىنىستارعا سەنبەۋگە، ساتۋشىنى تەكسەرۋگە، بەيتانىس ادامدارعا اقشا اۋدارماۋعا جانە تەحنيكانى تەك رەسمي دۇكەندەردەن ساتىپ الۋعا كەڭەس بەرەدى.
سونىمەن قاتار ازاماتتاردى بانك كارتالارىنىڭ دەرەكتەمەلەرىن، SMS-كودتاردى جانە جەكە مالىمەتتەردى بوگدە ادامدارعا بەرمەۋگە شاقىرادى.
ەسكە سالايىق، جاقىندا Apple العاشقى بۇكتەلەتىن سمارتفونىن، iPhone 18 Pro مەن Pro Max-تى، بەلسەندى شۋىل باساتىن قۇلاققاپتى جانە جەتىلدىرىلگەن «اقىلدى» ساعاتتى تانىستىرعان ەدى.