قازاقستاننىڭ ەڭبەك سىڭىرگەن قايراتكەرى، كومپوزيتور قالدىبەك ءقۇرمانالى ومىردەن وتكەن تانىمال ءانشى ءمادينا ەراليەۆا تۋرالى جۇرەككە جىلى تيەتىن ەستەلىكتەرىمەن ءبولىستى.
بۇل تۋرالى Infohub.kz اقپارات اگەنتتىگى حابارلايدى.
كومپوزيتوردىڭ ايتۋىنشا، ءمادينا ەراليەۆا ونىڭ ونەر جولىنداعى تۇلعا رەتىندە ەرەكشە ورىن العان. ول ءانشىنىڭ ءوزىن ءاردايىم قولداپ، ۇلكەن سەنىم ارتقانىن ەرەكشە اتاپ ءوتتى. قيىن كەزەڭدەردە كومەك قولىن سوزىپ، بىرگە گاسترولدىك ساپارلارعا شىعىپ، ونەردە شىڭدالۋىنا زور ىقپال ەتكەنىن ايتتى.
شىعارماشىلىق جولداعى تىرەك
«ءمادينا ەراليەۆا بولماعاندا، قالدىبەك ءقۇرمانالى دەگەن كومپوزيتور دا بولماس ەدى. ول مەن ءۇشىن تۋعان اپكەمدەي ەدى. ءتىپتى باسقا انشىلەر دە «سەنى ول بىزدەن ارتىق كوردى عوي» دەپ ايتاتىن. ءمادينانىڭ ماعان دەگەن قۇرمەتى ەرەكشە بولاتىن. مەنى قولىمنان جەتەكتەپ، وبلىس-وبلىس ارالاپ كونسەرت بەردى. قينالىپ جۇرگەندە ۇيىنە تەلەفون شالىپ، اقشا سۇراسام، ەش ايامايتىن. «الا بەر، مەندە بار عوي» دەيتىن. ول كىسىنىڭ قولداۋىنسىز مەن بۇگىنگىدەي بولماس ەدىم»، – دەپ كۇرسىندى كومپوزيتور.
جەكە ومىرىنە قاتىستى ويلار
ءقۇرمانالى ءانشىنىڭ بولات نازارباەۆقا تۇرمىسقا شىعۋ شەشىمىنە تاڭعالعانىن جاسىرمادى. ونىڭ پىكىرىنشە، ءمادينا ەراليەۆا ەركىندىگىن ساقتاپ، شىعارماشىلىق جولىن جالعاستىرعانىن قالاعان ەدى. الايدا، ءانشىنىڭ بۇل تاڭداۋىن قۇرمەتتەگەنىن جەتكىزدى.
«مەن ونىڭ بولات نازارباەۆقا قوسىلعانىن قولداعان جوقپىن. ءبىر كۇنى تەلەفون شالىپ، كۇيەۋگە شىعاتىنىن ايتتى. مەن كۇلدىم. بالا تۋاتىنداي جاعدايدا ەمەس ەدى عوي. جالعىزدىقتان شارشاعان شىعار دەپ ويلادىم. ۇيىنە بارسام، ەكى ادام وتىر. ءبىرىنىڭ مىنەزى اۋىرلاۋ ەكەن. بىر-ەكى سۇراق قويدىم، جاۋاپ بەرمەدى. ايتپەسە، مەن وتىرعان جەردى دۋمان-كۇلكىگە اينالدىراتىن ەدىم. ءبىراق مەن بولاشاق «جەزدەمدى» تانىمادىم. ءمادينا اپكەمنىڭ ءوزى ايتقاندا بارىپ، ءبىر-اق ءبىلدىم. «سىزگە كۇيەۋ نە كەرەك؟ اتاقتى ءانشىسىز، ءۇيىڭىز بار، بالاڭىز بار» دەدىم. ول كەزدە سامال اۋدانىنداعى 160 شارشى مەترلىك كەرەمەت ۇيىندە تۇراتىن. روزا باعلانوۆا ەكىنشى قاباتتا، ءمادينا توعىزىنشى قاباتتا تۇردى. ءبىراق ول ءوزى ۇناتىپ شىققان. ەركىن جۇرگەنىن قالادىم. توتىقۇس سياقتى بولىپ قالا ما دەپ قورىقتىم. «ءسال شىدا، جەزدەڭ جومارت، ءۇي دە، كولىك تە الىپ بەرەدى» دەدى. ءبىراق ءمادينا ومىردەن ءوتىپ كەتتى. ءۇي الىپ، كولىك ءمىنىپ، جەزدە مەن بالدىز بولىپ ارالاسقان جوقپىز»، – دەيدى كومپوزيتور.
ءانشىنىڭ سوڭعى ساتتەرى
ونەر قايراتكەرى ءانشىنىڭ قازاسىنا قاتىستى اۋىر ساتتەردى ەسكە الىپ، ونىڭ مەزگىلسىز كەتكەنىنە وكىنىش ءبىلدىردى. ول ءمادينا ەراليەۆانىڭ ءوز اجالىنان قايتىس بولعانىن اتاپ ءوتىپ، سول كەزەڭدەگى وقيعالاردىڭ وزىنە قاتتى اسەر ەتكەنىن ايتتى.
«ءمادينا ەراليەۆا 27 قاراشادا قايتىس بولدى. 1 جەلتوقساندا مۇحتار شاحانوۆتىڭ كەشىندە ءان ايتۋى كەرەك ەدى. تۋعان اپشەمدەي بولعان ءانشىنىڭ ءولىمىن جەڭىس ىسقاقوۆانىڭ كۇيەۋى ەستىرتتى. اقسايدا تۇراتىن ءسىڭلىسىنىڭ ۇيىنە بارىپ، ازان-قازان بولدىق. دەنەسىن ارنايى سامولەتپەن الماتىعا اكەلدى. ءبارىمىز اۋەجايعا باردىق. وبلىس اكىمى مەنى ءمايىتحاناعا جىبەردى. بولات نازاربايەۆ ۇشاقتا بىرگە كەلە جاتتى. ءمايىتحانادا دەنەسىن اشتى. بولات نازاربايەۆ ءولتىرىپ قويدى ما، ءوزى ءولدى مە، بىلگىم كەلدى. ءبىرىنشى كۇيەۋى بولات اتابايەۆ كورسىن دەدىم. سول جاعىنان سوققى بولعان. ال بولات نازارباەۆتىڭ وڭ قولى سىنعان. دەمەك، ءمادينا ەراليەۆا رولدە وتىرعان. سوندا بولات اتابايەۆ قۇسىپ جىبەردى. مەن توك سوققانداي بولدىم. بولات اتابايەۆ «مەن بولات نازاربايەۆ قىزعانىپ ءولتىرىپ قويدى ما دەپ ويلاپ ەدىم، ساعان راحمەت» دەدى. ايتايىن دەگەنىم، ءمادينا ەراليەۆا ءوز اجالىنان ولگەن. بولات نازارباەۆتىڭ ازاماتتىعىنا ريزا بولدىم. ول جەرلەۋگە، مەيرامحاناعا 20 مىڭ دوللار بەردى. ءبارىنىڭ شىعىنىن ءوزى تولەدى»، – دەپ ەسكە الدى ونەر قايراتكەرى.