قاراعاندىنىڭ سانيتارلىق-ەپيدەميولوگيالىق باقىلاۋ باسقارماسى الەۋمەتتىك جەلىلەردە تاراعان اكادەميك ە. ا. بوكەتوۆ اتىنداعى قاراعاندى ۇلتتىق زەرتتەۋ ۋنيۆەرسيتەتىندە تۋبەركۋلوزدىڭ كەڭ كولەمدە ءورشۋى تۋرالى اقپاراتتى رەسمي تۇردە جوققا شىعاردى. سانيتارلىق دارىگەرلەردىڭ دەرەگىنشە، قازىرگى تاڭدا وقۋ ورنىنىڭ ءۇش ستۋدەنتىنەن اۋرۋ انىقتالعان، دەپ حابارلايدى infohub.kz سايتى.
«قازىرگى تاڭدا تىركەلگەن تۋبەركۋلوز جاعدايلارى بويىنشا ەپيدەميولوگيالىق تەرگەۋ جۇرگىزىلۋدە. ينفەكسيا وشاعىندا وشاقتى وقشاۋلاۋعا جانە ينفەكسيانىڭ ودان ءارى تارالۋىنا جول بەرمەۋگە باعىتتالعان قاجەتتى سانيتارلىق-گيگيەنالىق، ەمدەۋ-پروفيلاكتيكالىق جانە ەپيدەمياعا قارسى شارالار كەشەنى ۇيىمداستىرىلىپ، جۇرگىزىلۋدە»، — دەلىنگەن ۆەدومستۆو حابارلاماسىندا.
سونىمەن قاتار سانيتارلىق-ەپيدەميولوگيالىق باقىلاۋ باسقارماسىندا قازىبەك بي اۋدانىنىڭ سانيتارلىق-ەپيدەميولوگيالىق باقىلاۋ باسقارماسى كارانتين ەنگىزۋ تۋرالى قاۋلى شىعارماعانىن اتاپ ءوتتى. سانەپيدەميولوگتار قازاقستاندىقتاردى جالعان اقپارات تاراتپاۋعا شاقىردى.
باسقارمانىڭ ءباسپاسوز قىزمەتى حابارلاعانداي، ەپيدەميولوگيالىق تەرگەۋ 30 كۇنگە سوزىلادى، سودان كەيىن ماماندار بولعان جاعداي تۋرالى تولىق اقپارات بەرە الادى.
كەيبىر دەرەكتەرگە قاراعاندا، اۋىرعان ستۋدەنتتەر وقۋدا دا، تۇرمىستا دا بىر-بىرىمەن ەشقانداي بايلانىسپاعان. ولار ءتۇرلى فاكۋلتەتتە وقيدى، ءتۇرلى كورپۋستارعا بارادى جانە ءبىر جاتاقحانادا تۇرمايدى. سوندىقتان ينفەكسيا كامپۋس قابىرعاسىندا جاپپاي تارالىپ جاتىر دەۋگە نەگىز جوق. ەكى ناۋقاس — جەرگىلىكتى تۇرعىن، ال ءۇشىنشىسى باتىس قازاقستان وبلىسىنان وقۋعا كەلگەنى بەلگىلى.
بۇعان دەيىن «كۋرسيۆ» قازاقستاندا اعىمداعى جىلدىڭ التى ايىندا تۋبەركۋلوزدىڭ 2 919 جاعدايى تىركەلگەنىن، بۇل ءبىر جىل بۇرىنعىدان 11%-عا از ەكەنىن جازعان بولاتىن.