سامارقاندتا (وزبەكستان) 46-شى دۇنيەجۇزىلىك شاحمات وليمپياداسىنىڭ ءۇشىنشى تۋرىنىڭ ماچتارى ءوتتى. قازاقستاننىڭ ايەلدەر قۇراماسى سلوۆەنيا كومانداسىن ۇتىپ، جەڭىس سەرياسىن جالعاستىردى، دەپ حابارلايدى infohub.kz سايتى.
سلوۆەنيالىق قارسىلاستار قاتىسۋشىلار رەيتينگىندە 25-ورىندا تۇر، الايدا ءۇش قازاقستاندىق شاحماتشى ءوز پارتيالارىندا جەڭىسكە جەتتى. الۋا نۇرمان زالا ۋرحتى ۇتتى، ەلناز كالياحمەت ناديا شپانكوdan باسىم ءتۇستى، ال زارينا نۇرعاليەۆا انجي بەبەردى جەڭدى.
ءبىرىنشى تاقتادا بيبيسارا اساۋباەۆا لاۋرا ۋنۋكپەن تەڭ وينادى. قازاقستاندىق شاحماتشى ءۇشىن بۇل تۋرنيردەگى ەكىنشى قاتارىنان تەڭ ويىن.
وسىلايشا، قازاقستاننىڭ ايەلدەر قۇراماسى ءۇشىنشى رەت قاتارىنان جەڭىسكە جەتتى. ايەلدەر تۋرنيرىنە بارلىعى 189 كوماندا قاتىسۋدا.
قازاقستاننىڭ ەرلەر قۇراماسى ءۇشىنشى تۋردا فرانسياعا 0،5:3،5 ەسەبىمەن جول بەردى. ۇلتتىق كومانداعا جالعىز جارتى ۇپايدى 2021 جىلعى بليس بويىنشا الەم چەمپيونى ماكسيم ۆاشە-لاگراۆپەن تەڭ ويناعان دەنيس ماحنيەۆ اكەلدى.
ساۋات نۇرعالييەۆ، الديار انسات جانە جاندوس اعمانوۆ ءوز پارتيالارىندا جەڭىلىس تاپتى.
بۇعان دەيىن قازاقستاندىق شاحماتشىلار گايتي مەن نيگەريا قۇرامالارىن ۇتقان بولاتىن. وليمپيادانىڭ ەرلەر تۋرنيرىنە 205 كوماندا قاتىسۋدا.