Қазақстан Премьер-министрі Олжас Бектенов Қырғызстанға ресми сапары барысында ынтымақтастық туралы бірқатар маңызды құжатқа, оның ішінде бауырлас қарым-қатынас орнату жөніндегі келісімдерге қол қойды. Бұл туралы infohub.kz сайты хабарлайды.
Сапар аясында Қазақстан үкіметінің басшысы Қазақстан мен Қырғызстан арасындағы өңіраралық ынтымақтастықтың «Стратегиялық серіктестікті дамытудағы өңірлердің рөлі» атты екінші форумына қатысты.
«Қырғызстан — Қазақстанның маңызды сауда серіктестерінің бірі. 2025 жылдың қорытындысы бойынша екіжақты сауда көлемі 33%-ға өсіп, 2,4 млрд долларға жетті. 2026 жылдың басынан бері бұл көрсеткіш өткен жылдың сәйкес кезеңімен салыстырғанда тағы 20%-ға артты», — делінген үкімет хабарламасында.
Қазақстан мен Қырғызстанның тау, экологиялық, жағажай және іскерлік туризм саласында бірлескен маршруттарды дамытуға кең мүмкіндіктері бар екені атап өтілді. 2026 жылдың тоғыз айында өзара туристік ағын 4 млн адамнан асты.
«Тараптар өңірлер арасындағы тікелей байланысты одан әрі кеңейтуге, бірлескен өндірістерді, сауданы, көлік инфрақұрылымын және туризмді дамытуға мүдделі екенін растады. Жоспарланған бастамаларды жүзеге асыру қазақ-қырғыз стратегиялық серіктестігін нығайтуға және өңірдің тұрақты экономикалық дамуына ықпал етеді», — деп мәлімдеді үкіметте.
Форум қорытындысы бойынша өңіраралық ынтымақтастық пен іскерлік байланыстарды кеңейтуге бағытталған құжаттарға қол қойылды. Атап айтқанда, Алматы мен Бішкек арасында 2026–2030 жылдарға арналған бауырлас қарым-қатынасты дамыту туралы келісімге қол қойылды.
Сондай-ақ Түркістан мен Манас қаласы, Щучинск-Бурабай курорттық аймағы мен Ыстықкөл көлінің курорттық аймағы арасында бауырлас қарым-қатынас орнатылды.
Бірқатар келісім Қырғызстанның Ыстықкөл, Жалалабат және Нарын облыстарымен ынтымақтастықты кеңейтуге бағытталған. Сонымен қатар сауда, экспорт және қазақстандық өнімді Қырғызстан нарығына жылжыту салаларында бірқатар коммерциялық құжатқа қол қойылды.