قازاقستاندا زاماناۋي سيفرلىق تەحنولوگيالاردى ەنگىزۋ ارقىلى جول قوزعالىسىن باقىلاۋ ايتارلىقتاي كۇشەيتىلدى. ەندى ءتارتىپ ساقشىلارىنا ۇشقىشسىز ۇشاتىن اپپاراتتار، ءموبيلدى كەشەندەر جانە ورتاشا جىلدامدىقتى باقىلاۋ جۇيەلەرى كومەككە كەلدى، دەپ حابارلايدى infohub.kz سايتى.
ىشكى ىستەر مينيسترلىگىنىڭ اقپاراتتىق مەدياپورتالىندا اتاپ وتىلگەندەي، يننوۆاسيالىق ازىرلەمەلەر پوليسيا قىزمەتكەرلەرىنە جول قوزعالىسى ەرەجەلەرىنىڭ بۇزىلۋىن ءتيىمدى انىقتاۋعا، ءقاۋىپتى جاعدايلارعا جەدەل دەن قويۋعا جانە جول-كولىك وقيعالارىنىڭ الدىن الۋعا مۇمكىندىك بەرەدى. ۆەدومستۆو: «بۇگىندە قوعامدىق ءتارتىپتى قامتاماسىز ەتۋ سيفرلىق قۇرالداردى ەنگىزۋمەن جۇزەگە اسىرىلۋدا. ازاماتتارعا جەدەل كومەك كورسەتۋ جانە دەن قويۋ ماڭىزدى. سوندىقتان ازاماتتاردى قىلمىستىق قول سۇعۋشىلىقتان قورعاۋ ادىستەرى مەن نىساندارى، سونداي-اق جول قاۋىپسىزدىگىن قامتاماسىز ەتۋ سالاسىنداعى تاسىلدەر كۇن سايىن جەتىلدىرىلۋدە. سيفرلىق شەشىمدەر قۇقىق بۇزۋشىلاردى انىقتاۋعا جانە ولاردى جاۋاپكەرشىلىككە تارتۋعا ىقپال ەتەدى»، — دەپ اتاپ ءوتتى.
ۇشقىشسىز ۇشاتىن اپپاراتتار جول قوزعالىسىن اۋەدەن ۇزدىكسىز باقىلاۋدى قامتاماسىز ەتەدى. وسىنىڭ ارقاسىندا جىلدام ءجۇرۋ اۋەسقويلارى مەن قاساقانا ەرەجە بۇزۋشىلار ەندى جاۋاپكەرشىلىكتەن قۇتىلا المايدى — بۇزۋشىلىقتار بيىكتىكتەن تىركەلەدى. دەگەنمەن، درونداردى قولدانۋدىڭ باستى ماقساتى — جازالاۋ ەمەس، ءقاۋىپتى جاعدايلارعا ۋاقىتىلى دەن قويۋ ارقىلى قازاقستاندىقتاردىڭ ءومىرى مەن دەنساۋلىعىن ساقتاۋ.
پوليسيانىڭ تاعى ءبىر ءتيىمدى كومەكشىسى — پاترۋلدىك كولىكتەرگە ورناتىلعان ءموبيلدى كەشەندەر. ولار كولىك اعىنىندا رۋلدە ۇيالى تەلەفوندى پايدالانۋ، جاياۋ جۇرگىنشىلەرگە جول بەرمەۋ، جىلدامدىقتى ارتتىرۋ جانە مانەۆر جاساۋ ەرەجەلەرىن ساقتاماۋ سياقتى بۇزۋشىلىقتاردى وڭاي انىقتاۋعا مۇمكىندىك بەرەدى.
قالا سىرتىنداعى تراسسالاردا جىلدامدىقتى ارتتىرۋدى ۇناتاتىندار ءۇشىن ورتاشا جىلدامدىقتى باقىلاۋ جۇيەسى قولدانىلادى. ول كولىك قۇرالىنىڭ بۇكىل جول بويىنداعى قوزعالىسىن تالدايدى. ءقازىر مۇنداي جۇيە رەسپۋبليكالىق ماڭىزى بار 12 نەگىزگى باعىتتا ەنگىزىلگەن، دەپ ناقتىلادى ءىىم.
اپاتتىلىقتىڭ الدىن الۋ ماقساتىندا تۇنگى ۋاقىتتا، رۋلدە ۇيقىشىلدىقتى سەزىنەتىن جۇرگىزۋشىلەر ءۇشىن، سونداي-اق قولايسىز اۋا رايى جاعدايىندا ەرەكشە وزەكتى بولىپ تابىلاتىن لازەرلىك جۇيەلەر دە قولدانىلادى.
«سيفرلىق تەحنولوگيالارمەن قاتار جولداردا ءجۇرۋ بولىگىن جاساندى تارىلتۋ بويىنشا جۇمىس جۇرگىزىپ جاتىرمىز. بۇل جۇرگىزۋشىلەردىڭ جىلدامدىق رەجيمىن تومەندەتۋى، زەيىنىن ارتتىرۋى جانە جيناقى تۇردە قوزعالىستى جالعاستىرۋى ءۇشىن جاسالۋدا. بارلىق وسى شارالار ازاماتتاردى قورعاۋدى كۇشەيتۋگە، سونداي-اق جولدارداعى اپاتتىلىق دەڭگەيىن تومەندەتۋگە باعىتتالعان. ويتكەنى ءبىز ءۇشىن جۇرگىزۋشىلەر مەن جولاۋشىلاردىڭ جولعا شىققاندا ءوز قاۋىپسىزدىگىنە سەنىمدى بولۋى ماڭىزدى»، — دەپ اتاپ ءوتتى ءىىم اكىمشىلىك پوليسيا كوميتەتى ءتوراعاسىنىڭ ورىنباسارى باعلانبەك ايتپايەۆ.