قازاقستان پوليسەيلەرى ءبىر اپتا ىشىندە جول قوزعالىسى ەرەجەلەرىنىڭ 10 مىڭعا جۋىق بۇزۋشىلىعىن انىقتادى. اسىرەسە دريفت پەن ماس كۇيدە كولىك جۇرگىزۋشىلەرگە ەرەكشە نازار اۋدارىلدى. بۇل تۋرالى ىشكى ىستەر مينيسترلىگى حابارلادى، دەپ جازادى infohub.kz.
انىقتالعان بۇزۋشىلىقتاردىڭ ىشىندە 201 ماس كۇيدە كولىك جۇرگىزۋ فاكتىسى تىركەلدى. وسىنداي جاعدايلاردىڭ ءبىرى تۇندە ۇشتوبە قالاسىندا بولدى: پوليسەيلەر Toyota Marino كولىگىن توقتاتتى، ونىڭ رولىندە 34 جاستاعى ماس ەر ادام وتىرعان. سوت ونى 15 تاۋلىككە قاماۋعا الىپ، جەتى جىلعا جۇرگىزۋشى كۋالىگىنەن ايىردى.
سونىمەن قاتار، ۆەدومستۆو دريفت پەن ءقاۋىپتى جۇرگىزۋ فاكتىلەرىن توقتاتۋ پوليسەيلەردىڭ تۇراقتى باقىلاۋىندا ەكەنىن اتاپ ءوتتى. سوڭعى اپتادا مۇنداي بۇزۋشىلىقتار استانا، قوستاناي جانە شىمكەنت قالالارىندا انىقتالدى.
ماسەلەن، استانادا ەكى جاس جۇرگىزۋشى شامشي قالداياقوۆ كوشەسىندە دريفت جاسادى. ەكەۋى دە 10 تاۋلىككە قاماۋعا الىنىپ، كولىكتەرى ارنايى تۇراققا قويىلدى. قوستانايدا دريفت بەينەباقىلاۋ كامەرالارىنا ءتۇسىپ، جۇرگىزۋشى تەز انىقتالدى. ول جىل باسىنان بەرى جقە بۇزعانى ءۇشىن 16 رەت جاۋاپكەرشىلىككە تارتىلعانى بەلگىلى بولدى. سوت وعان 15 تاۋلىك قاماۋ جازاسىن تاعايىندادى. ال شىمكەنتتە 18 جاستاعى Mercedes-Benz جۇرگىزۋشىسى دريفت جاساپ، تۇندە تىنىشتىقتى بۇزدى — ول دا 10 تاۋلىككە قاماۋعا الىندى.
بۇدان بولەك، 21 قىركۇيەكتەن باستاپ ەلىمىز بويىنشا 13 مىڭنان استام زاڭسىز جازۋ مەن گراففيتي جويىلدى. التى مىڭنان استام اكىمشىلىك ءىس قوزعالدى. ءتورت ەڭ اۋىر فاكتى بويىنشا سوتقا دەيىنگى تەرگەۋ باستالدى: بىرەۋى — ۆانداليزم، تاعى ۇشەۋى — ەسىرتكى گراففيتيى بويىنشا.
سونداي-اق، اپتا ىشىندە پوليسەيلەر ءىزىن سۋىتپاي ءبىر كىسى ءولتىرۋ، ولىمگە اكەپ سوققان اۋىر دەنە جاراقاتىن قاساقانا كەلتىرۋدىڭ ءۇش فاكتىسى، 11 توناۋ، 218 ۇرلىق، سونداي-اق جەتى مال ۇرلىعى مەن سەگىز كولىك ۇرلىعىن اشتى، دەدى ءىىم.
ايتا كەتەيىك، جاقىندا Mercedes-Benz جۇرگىزۋشىسى قازاق حاندىعى ەسكەرتكىشىنىڭ جانىندا دريفت جاساپ، قاماۋعا الىنعان بولاتىن.