Қостанай қалалық соты жергілікті әкімдіктің құрылыс бөлімін Chevrolet көлігінің иесіне 290 мың теңге өтемақы төлеуге міндеттеді. Себебі көлік ашық қалған қарау құдығына тап болған, деп хабарлайды infohub.kz сайты.
Облыстық соттың баспасөз қызметі мәлім еткендей, оқиға 2025 жылдың қазан айында Береке шағын ауданында болған. Ашық құдық тікелей жүріс бөлігінде тұрған, ал көлік оған тап болған соң механикалық зақым алған.
Бұған дейін жауапкер қарау құдықтарын ұстау ережелерін бұзғаны үшін жауапкершілікке тартылған. Бұл бұзушылық жол-көлік оқиғасына және көліктің бүлінуіне әкеп соққан.
Талқылау барысында құрылыс бөлімінің өкілі талапқа қарсылық білдірді. Ол нысандағы құрылыс жұмыстары әлі аяқталмағанын, демек, қауіпсіздік үшін мердігер жауапты болуы керектігін алға тартты.
Алайда сот қарау құдығы дәл құрылыс бөлімінің жауапты ұстауында болғанын анықтады. Ведомствоның жауапкершілігін жоққа шығаратын дәлелдер ұсынылмады.
Нәтижесінде талап қанағаттандырылды: жауапкерден 205,4 мың теңге материалдық шығын, сондай-ақ зақымды бағалауға кеткен 85 мың теңге өндірілді.
Бұған дейін «Курсив Авто» Қазақстанда көлік шұңқырдан зардап шеккен жағдайда айыппұлды қалай өндіруге болатынын жазған болатын.