InfoHub Logo

ءبىر قۇمىرسقا ارىستاننىڭ قول استىندا جۇمىس ىستەيدى. كۇندە تاڭ ەرتەڭگىسىن ەرتە كەلىپ، جۇمىسىن كوتەرىڭكى كوڭىل-كۇيمەن باستايدى. كوپ ەڭبەك ەتەتىندىكتەن جۇمىستىڭ ونىمدىلىگى دە وتە كوپ بولاتىن جانە بۇلاردى جاقسى كوڭىل-كۇيمەن جاسايتىن. قوجايىنى ارىستان، قۇمىرسقانىڭ باسىندا باقىلاپ تۇراتىن باسشىسى بولماسا دا وسىلاي وزدىگىنەن، ىقىلاسپەن جۇمىس ىستەيتىنىنە تاڭ قالاتىن. ءبىر كۇنى جۇمىستىڭ تابىسى مەن ونىمدىلىگىن ارتتىرۋ ءۇشىن، اينالاسىنداعى كاسىپورىندارعا دا كوز جۇگىرتىپ، ويىنا جاقسى ءبىر پىكىر كەلەدى. بۇل قۇمىرسقا ءقازىر ءوز ىنتاسىمەن وسىنشالىقتى مىقتى ناتيجەلەر بەرۋدە، ەگەر ونىڭ قابىلەتتى ءبىر باستىعى بار بولسا، بۇدان دا كوپ تابىس اكەلمەي مە، دەپ ءبىر تاجىريبەلى تاراقاندى جۇمىسقا الادى. وسى ارقىلى قۇمىرسقانى باقىلايدى. تاراقان جۇمىس ۋاقىتىندا جالقاۋلىققا جول بەرمەيتىن. ارينە ەندى تاراقانعا باياندامالاردى رەتتەيتىن حاتشى دا قاجەت ەدى. سول سەبەپتەن تەلەفون جانە ارحيۆ جۇمىستارىنا قارايتىن ورمەكشىنى جۇمىسقا الادى.

ارىستان بۇل جەتىستىكتەرگە وتە قۋانىشتى ەدى. بەرىلگەن باياندامالارى شىنىمەن دە كەرەمەت ەدى. ءوندىرىستىڭ جىلدامدىعىن جانە تابىسقا اناليز جاسايتىن ءتۇرلى ءتۇستى گرافيكتەردىڭ بولۋىن دا تالاپ ەتەدى. بۇلار ارقىلى باياندامالاردى دوستارىنا ۇسىنىپ كورسەتە الار ەدى. تاراقانعا بۇل باياندامالاردى وڭدەۋ ءۇشىن جاڭا كومپيۋتەر جانە باسقا دا قۇرال-جابدىقتار قاجەت بولادى. وسىلايشا بارعان سايىن كوبەيگەن جۇمىس تالاپتارىن باسقارۋ ءۇشىن ءبىر ماسانى جۇمىسقا الادى. اۋەلدە قۋانىشتى، ەڭبەكقور قۇمىرسقا ەندى بىتپەيتىن جينالىستاردان، تولتىرۋدى قاجەت ەتەتىن قۇجاتتاردان قاشاتىن بولدى. ۋاقىتىنىڭ كوپ بولىگىن سۇراقتارعا جاۋاپ بەرۋمەن وتكىزۋدە ەدى.

ارىستان بولسا جۇمىسىنىڭ بارعان سايىن ۇلكەيىپ جاتقانىنا قۋانادى. ودان دا ۇلكەيۋى ءۇشىن ءبولىم مەڭگەرۋشىسى رەتىندە شىبىندى جۇمىسقا الادى. شىبىننىڭ ءبىرىنشى قىزمەتى وفيستى جاڭا جيھازدارمەن جابدىقتاۋ بولدى. ارينە جاڭا كومپيۋتەر، بيۋدجەتتى باقىلاۋ جانە ستراتەگيالىق تابىس جوسپارىنىڭ دايىندالۋى ءۇشىن وعان دا كومەكشى قاجەت بولادى.

قۇمىرسقانىڭ بولىمىندەگى جاعدايلارعا كوز جۇگىرتكەن ارىستان، ءونىمنىڭ جانە تابىستىڭ تومەندەگەنىن بايقايدى. دەرەۋ اتى شۋلى، دانىشپان ۇكىنى پروبلەمانى شەشۋ ءۇشىن جۇمىسقا الادى. ۇكى 3 ايدان كەيىن كەرەمەت ءبىر راپورت دايىندايدى. راپورتتىڭ قورىتىندىسى مىناداي ەدى:

«بۇل جۇمىس ورنىندا جۇمىسشىلار شامادان تىس كوپ.»

ارىستان بايانداماعا قاراپ شىققاننان كەيىن ءبىر شەشىمگە كەلەدى. ءبىرىنشى كەزەكتە، جۇمىسقا دەگەن ىقىلاسى قالماعان قۇمىرسقانى جۇمىستان شىعارادى.

---