قىزىلوردادا ۇيىمداسقان قىلمىسقا قارسى كۇرەس بولىمشەسىنىڭ قىزمەتكەرلەرى ۇيىمداسقان قىلمىستىق توپتىڭ ارەكەتىن توقتاتتى، دەپ حابارلايدى infohub.kz سايتى.
ىشكى ىستەر مينيسترلىگىنىڭ اقپاراتتىق مەدياپورتالى ءمالىم ەتكەندەي، جەدەل-ىزدەستىرۋ شارالارىنىڭ بارىسىندا قىزىلوردادا توپ مۇشەلەرى كاسىپكەرلەر مەن ازاماتتاردان كۇش قولدانامىز دەپ قورقىتىپ، اقشا تالاپ ەتكەنى انىقتالدى. سونىمەن قاتار ولار باس بوستاندىعىنان ايىرۋ ورىندارىندا جازاسىن وتەپ جاتقاندارعا كومەك كورسەتۋ سىلتاۋىمەن «ورتاق قور» جيناۋمەن اينالىسقان.
تەرگەۋ بارىسىندا قۇقىققا قارسى ارەكەتتىڭ كوپتەگەن ەپيزودى قۇجاتتالدى، سانكسيالانعان ءتىنتۋ جۇرگىزىلىپ، ونىڭ ناتيجەسىندە تراۆماتيكالىق جانە پنەۆماتيكالىق قارۋ، ءوق-دارى، اقشا قاراجاتى، سونداي-اق وزگە دە زاتتاي دالەلدەمەلەر تاركىلەندى.
جابىرلەنۋشىلەر مەن كۋاگەرلەردىڭ جاۋاپتارى الىنىپ، توپتىڭ قىلمىستىق ارەكەتىن راستايتىن بانكتىك اۋدارىمدار مەن سيفرلىق دالەلدەمەلەر زەرتتەلدى.
اقشا تالاپ ەتۋ، قارۋدى زاڭسىز ساقتاۋ، بۇزاقىلىق جانە ۇيىمداسقان قىلمىستىق توپقا قاتىسۋ فاكتىلەرى بويىنشا ءبىرقاتار قىلمىستىق ءىس تىركەلدى. كۇدىكتى رەتىندە سەگىز ادام تارتىلىپ، ولاردىڭ كوبىسىنە قاماۋعا الۋ تۇرىندەگى بۇلتارتپاۋ شاراسى قولدانىلدى.
سوتقا دەيىنگى تەرگەۋ اياقتالعان سوڭ قىلمىستىق ءىس سوتقا جىبەرىلدى. سوت ۇكىمىمەن ۇيىمداسقان قىلمىستىق توپتىڭ ۇيىمداستىرۋشىسى مەن ونىڭ بەلسەندى قاتىسۋشىلارى ءارتۇرلى مەرزىمگە — 4 جىلدان 11 جىلعا دەيىن باس بوستاندىعىنان ايىرىلدى. ۇكىم زاڭدى كۇشىنە ەندى.