يسمايليا پروۆينسياسىنىڭ سولتۇستىگىندەگى سيناي تۇبەگىندە ورنالاسقان تەلل-ابۋ-سايفي نىسانىندا جۇمىس ىستەپ جاتقان ارحەولوگيالىق ەكسپەديسيا فاراون رامسەس II ەسىمى جازىلعان قۇمتاس تاقتانى جانە مەسن قالاسى تۋرالى دەرەكتەردى تاپتى. بۇل جوعالعان ەجەلگى مىسىرلىق قالانىڭ ورنىن انىقتاۋعا كومەكتەسۋى مۇمكىن، دەپ حابارلايدى infohub.kz سايتى.
XIX اۋلەتكە جاتاتىن ارتەفاكتىنىڭ ءۇش جاعىندا رامسەس IIء-نىڭ پاتشالىق اتاقتارى مەن «حور، مەسن قالاسىنىڭ ءامىرشىسى» ءمۇسىنىن قالپىنا كەلتىرۋ تۋرالى جازبا ساقتالعان. مىسىرلىق عالىمداردىڭ پىكىرىنشە، بۇل تابىلعان جادىگەر ەجەلگى اسكەري جول — حور جولىنداعى تەلل-ابۋ-سايفيدى ىزدەلىپ جۇرگەن مەسن قالاسىمەن بايلانىستىرۋى مۇمكىن.
سونداي-اق، نىساننان كىرپىشتەن قالانعان قالىڭ قابىرعاسى، عيباداتحاناسى جانە قويمالارى بار حرامنىڭ قيراندىلارى تابىلدى. كەشەن پتولەمەيلەر داۋىرىندە كەڭەيتىلگەن، ال ءبىزدىڭ زامانىمىزدىڭ III عاسىرىندا ريمدىكتەر ونى اسكەري لاگەر سالۋ ءۇشىن ءىشىنارا بولشەكتەپ، عيباداتحانانىڭ ورنىنا اك كۇيدىرەتىن پەشتەر ورناتقان.
باسقا تابىلعان جادىگەرلەردىڭ قاتارىندا ەكى تاس توسەلگەن جول جانە XXVI اۋلەتتىڭ اسكەري حاتشىسىنىڭ سلانەستەن جاسالعان ءمۇسىنى بار. بۇل ولجالار ايماقتىڭ ستراتەگيالىق ماڭىزىن راستايدى.