قازاقستاننىڭ ءبىرىنشى راكەتكاسى ەلەنا رىباكينا اقش-تىڭ اشىق چەمپيوناتىندا جەڭىس سەرياسىن جالعاستىرۋدا، دەپ حابارلايدى infohub.kz.
ءتورتىنشى اينالىمدا الەمدىك رەيتينگتە ەكىنشى ورىندا تۇرعان سپورتشى جاپونيالىق ناومي وساكامەن كەزدەستى. وساكا — بۇرىنعى الەمدىك ءبىرىنشى راكەتكا جانە US Openء-تىڭ ەكى دۇركىن چەمپيونى. بۇل تۋرنيرگە ول WTA رەيتينگىندە 13ء-شى ورىندا تۇرىپ كەلدى.
ماچ نەبارى ەكى سەتكە سوزىلىپ، رىباكينانىڭ 6:1، 6:4 ەسەبىمەن سەنىمدى جەڭىسىمەن اياقتالدى. تەننيسشىلەر كورتتا 1 ساعات 6 مينۋت وتكىزدى.
كەزدەسۋ بارىسىندا قازاقستاندىق تەننيسشى جەتى ەيس جاساپ، ءبىر قوس قاتەلىك جىبەردى جانە سەگىز برەيك-پوينتتىڭ ۇشەۋىن پايدالانا الدى، ءوز پوداچاسىن ەشقاشان بەرمەدى.
رىباكينا ءۇشىن بۇل — US Open-تە مانسابىنداعى تۇڭعىش شيرەك فينال. وسىلايشا، ول ەندى ۇلكەن شلەمنىڭ ءتورت تۋرنيرىندە دە وسى كەزەڭگە جەتتى.
كەلەسى ماچتا قازاقستاندىق تەننيسشى قىتايلىق چجەن سينۆەنمەن كەزدەسەدى. پاريج-2024 وليمپيادا چەمپيونى ءتورتىنشى اينالىمدا پولياك يگا شۆەنتەكتەن باسىم ءتۇستى.
چجەننەن جەڭسە، رىباكينا باسەكەلەستەرىنىڭ ناتيجەسىنە قاراماستان، الەمدىك ءبىرىنشى راكەتكا اتاعىن وزىنە قامتاماسىز ەتەدى.