الەمنىڭ ەكىنشى راكەتكاسى ەلەنا رىباكينا اقش اشىق تەننيس چەمپيوناتىندا سەنىمدى ونەر كورسەتىپ، بەدەلدى ءتۋرنيردىڭ ءتورتىنشى اينالىمىنا جولداما الدى. ءۇشىنشى راۋندتا قازاقستاندىق سپورتشى الەمدىك رەيتينگتىڭ 58-ساتىسىندا تۇرعان ۋكراينالىق يۋليا ستارودۋبسەۆانى 7:6 (8:6)، 6:3 ەسەبىمەن ۇتتى، دەپ حابارلايدى infohub.kz سايتى.
1 ساعات 52 مينۋتقا سوزىلعان باسەكە رىباكيناعا وڭايعا سوققان جوق. ءبىرىنشى پارتيادا تەننيسشىلەر تەڭ ويىن كورسەتىپ، تاي-برەيككە دەيىن جەتتى. وندا ساتتىلىك قازاقستاندىق تاراپتا بولدى — 8:6. ەكىنشى سەتتە ەلەنا قابىلداۋدا باسىمدىققا يە بولىپ، كەزدەسۋدى 6:3 ەسەبىمەن سەنىمدى اياقتادى.
ماچ ستاتيستيكاسى رىباكينانىڭ كۇشتى سەرۆيسىن كورسەتەدى: ونىڭ ەنشىسىندە 12 ەيس، ال قوسارلانعان قاتەلىك تەك بىرەۋ عانا. قازاقستاندىق ءبىرىنشى پوداچاداعى 34 روزىگرىشتىڭ 28ء-ىن ۇتىپ، 82 پايىز ناتيجە كورسەتتى. ستارودۋبسەۆا بولسا، نەبارى ءبىر رەت ەيس جاساپ، ءۇش رەت قوسارلانعان قاتەلىك جىبەردى.
رىباكينانىڭ بەلسەندى ۇتىس ويىندارىنداعى باسىمدىعى ەرەكشە بايقالدى — 33 ۆيننەرگە قارسى قارسىلاسىندا 8 عانا. ال ەرىكسىز قاتەلىكتەردە قازاقستاندىق 30 رەت، ۋكراينالىق 14 رەت قاتەلەستى. ەلەنا 13 برەيك-پوينتتىڭ تورتەۋىن پايدالانسا، ستارودۋبسەۆا ۇشەۋدىڭ ەكەۋىن عانا ىسكە اسىردى. جالپى ۇپاي سانى بويىنشا دا الەمنىڭ ەكىنشى راكەتكاسى قارسىلاسىنان باسىم ءتۇستى — 81:68.
بۇل جەڭىس رىباكينا ءۇشىن Roland Garros-2026-داعى ساتسىزدىك ءۇشىن رەۆانش بولدى. وندا ستارودۋبسەۆا ەكىنشى اينالىمدا قازاقستاندىقتى 3:6، 6:1، 7:6 (7:4) ەسەبىمەن سەنساسيالىق تۇردە ۇتقان ەدى. پاريجدەگى كەزدەسۋگە دەيىن ۋكراينالىق تەننيسشى الەمدىك وندىقتاعى ويىنشىلاردى ەشقاشان جەڭبەگەن بولاتىن.
ءتورتىنشى اينالىمعا شىعۋ رىباكيناعا US Open-داعى ءوزىنىڭ ۇزدىك ناتيجەسىن قايتالاۋعا مۇمكىندىك بەردى. بۇل كورسەتكىشكە ول العاش رەت وتكەن ماۋسىمدا قول جەتكىزگەن ەدى.
1/8 فينالدا ەلەنا «ۇلكەن دۋلىعا» تۋرنيرلەرىنىڭ ءتورت دۇركىن جەڭىمپازى ناومي وساكامەن (13) كەزدەسەدى. جاپونيالىق تەننيسشى ءۇشىنشى اينالىمدا ەليزە مەرتەنستى (20) 6:3، 3:6، 7:5 ەسەبىمەن ۇتتى. تامىز ايىندا تورونتوداعى تۋرنيردە رىباكينا وساكانى ءۇش سەتتە جەڭگەن بولاتىن.
اقش اشىق تەننيس چەمپيوناتى — حاردتا وتەتىن جىل سايىنعى «ۇلكەن دۋلىعا» ءتۋرنيرى، مەيدجورلار ماۋسىمىن اياقتايدى. العاش رەت 1881 جىلى تامىزدا وتكىزىلگەن US Open، ميكس ءتۋرنيرىنىڭ كەيىنگە شەگەرىلۋىنە بايلانىستى ەكىنشى جىل قاتارىنان ءبىر اپتا ەرتە باستالادى. جارىستىڭ جالپى جۇلدە قورى مەيدجورلار ءۇشىن رەكوردتىق 108 ميلليون دوللاردى قۇرايدى. 1978 جىلدان بەرى ماچتار نيۋ-يوركتەگى بيللي دجين كينگ اتىنداعى ۇلتتىق تەننيس ورتالىعىندا وتەدى.
ەرلەر اراسىندا قازىرگى چەمپيون — يسپانيالىق كارلوس الكاراس (3). ول وتكەن جىلعى فينالدا ياننيك سيننەردى 6:2، 3:6، 6:1، 6:4 ەسەبىمەن جەڭگەن ەدى. الەمنىڭ ءبىرىنشى راكەتكاسى يتاليالىق تەننيسشى تىزە جاراقاتىنا بايلانىستى US Open-2026-دان باس تارتتى. ايەلدەر اراسىندا 2025 جىلعى جەڭىمپاز — بەلارۋس ارينا سوبولەنكو. ول شەشۋشى ماچتا امەريكالىق اماندا انيسيموۆانى 6:3، 7:6 (7:3) ەسەبىمەن ۇتقان.