الەمنىڭ ءبىرىنشى راكەتكاسى ەلەنا رىباكينا اقش اشىق چەمپيوناتىندا 2026 جىلى جەڭىسكە جەتكەن سوڭ مانسابىنداعى كەزەكتى باستى ماقساتىن اتادى. ول — «رولان گارروستا» جەڭىسكە جەتۋ. بۇل وعان «ۇلكەن دۋلىعا» تۋرنيرلەرىنىڭ ءتورت تيتۋلىن دا جيناۋعا مۇمكىندىك بەرەدى، دەپ حابارلايدى infohub.kz سايتى.
نيۋ-يوركتە قازاقستاندىق تەننيسشى مانسابىنداعى ءۇشىنشى مەيدجوردى جەڭىپ الدى. فينالدا ول ارينا سوبولەنكونى 6:4، 5:7، 6:2 ەسەبىمەن ۇتتى. بۇعان دەيىن رىباكينا ۋيمبلدون-2022 مەن Australian Open-2026-دا توپ جارعان. ەندى ءتورت باستى تەننيس ءتۋرنيرىنىڭ ىشىنەن وعان ءپاريجدىڭ گرۋنت كورتتارىنداعى تيتۋل عانا جەتىسپەي تۇر.
«مەن ءۇشىن بۇل ءبارىن بىلدىرەر ەدى، ويتكەنى ءارتۇرلى جابىندىلاردا ءتورت «ۇلكەن دۋلىعا» ءتۋرنيرىن دە ۇتىپ الۋ — وراسان زور جەتىستىك دەپ ويلايمىن. مۇنى قانشا ادامنىڭ باعىندىرعانىن بىلمەيمىن، ءبىراق ءيا، «رولان گارروس» — مەنىڭ كەلەسى ماقساتىم. ءدال وسى ءۇشىن كومانداممەن بىرگە جۇمىس ىستەيمىز. الداعى بىرنەشە جىلدا وسىعان جەتۋ ءۇشىن قاجەتتىنىڭ ءبارىن جاقسارتۋعا تىرىسامىز»، — دەپ كەلتىرەدى رىباكينانىڭ ءسوزىن Punto de Break.
ەگەر رىباكينا «رولان گارروستى» جەڭسە، ول مانسابىندا ءتورت «ۇلكەن دۋلىعا» ءتۋرنيرىنىڭ ءارقايسىسىندا كەمىندە ءبىر رەت جەڭىسكە جەتكەن تەننيسشىلەر قاتارىنا قوسىلار ەدى.
اشىق داۋىردە مۇنداي جەتىستىك جەتى تەننيسشىگە باعىنعان: مارگارەت كورت، بيللي دجين كينگ، كريس ەۆەرت، مارتينا ناۆراتيلوۆا، شتەففي گراف، سەرەنا ۋيليامس جانە ماريا شاراپوۆا. سوڭعى بولىپ مانساپتىق «ۇلكەن دۋلىعانى» شاراپوۆا تولىقتىردى، ول «رولان گارروستى» العاش رەت 2012 جىلى جەڭىپ العان.
گرۋنتتى مەيدجوردا رىباكينا ازىرگە شيرەك فينالدان ءارى وتكەن ەمەس. بۇل كەزەڭگە ول ەكى رەت جەتتى – 2021 جانە 2024 جىلدارى. 2021 جىلى قازاقستاندىق تەننيسشى مانسابىندا العاش رەت «ۇلكەن دۋلىعا» ءتۋرنيرىنىڭ شيرەك فينالىنا شىعىپ، جولدا سەرەنا ۋيليامستى ۇتتى.
سونىمەن قاتار رىباكينانىڭ گرۋنتتا ءىرى تيتۋلى بار. 2023 جىلى ول ريمدەگى WTA 1000 ءتۋرنيرىنىڭ جەڭىمپازى اتاندى.
ەسكە سالايىق، US Open-2026-دان كەيىن 27 جاستاعى رىباكينا العاش رەت WTA رەيتينگىندە كوش باستادى.