قازاقستاننىڭ ءبىرىنشى راكەتكاسى ەلەنا رىباكينا مانسابىندا العاش رەت تەننيستەن اقش اشىق چەمپيوناتىنىڭ فينالىنا شىقتى. وندا ول ارينا سوبولەنكومەن تاقتى ساراپقا سالادى، دەپ حابارلايدى infohub.kz سايتى.
US Open 2026 جارتىلاي فينالىندا ەكىنشى سەريالىق ءنومىر يەسى الەمنىڭ ءتورتىنشى راكەتكاسى ءارى 2023 جىلعى اقش اشىق چەمپيوناتىنىڭ جەڭىمپازى امەريكاندىق كوكو گاۋففپەن كەزدەستى. باسەكە وتە تارتىستى ءوتىپ، ءۇش سەتكە سوزىلدى دا، قازاقستاندىق تەننيسشىنىڭ 3:6، 6:4، 6:4 ەسەبىمەن ەرىك-جىگەرلى جەڭىسىمەن اياقتالدى.
سپورتشىلار كورتتا 2 ساعات 9 مينۋت وتكىزدى. وسى ۋاقىت ىشىندە رىباكينا بەس ەيس جاساپ، ەكى قوسارلانعان قاتە جىبەردى جانە التى برەيك-پوينتتىڭ تورتەۋىن پايدالاندى.
تاق ءۇشىن شەشۋشى ماچتا قازاقستاندىق ارينا سوبولەنكومەن وينايدى. بەلارۋس تەننيسشىسى — امەريكاندىق حارد مەيدجورىنىڭ الدىڭعى ەكى روزىگرىشىنىڭ چەمپيونى. ءوز جارتىلاي فينالىندا ول اقش وكىلى دجەسسيكا پەگۋلادان 7:5، 6:2 ەسەبىمەن باسىم ءتۇستى.
ماۋسىمداعى سوڭعى ۇلكەن دۋلىعا ءتۋرنيرىنىڭ قورىتىندىسى بويىنشا رىباكينا الەمنىڭ ءبىرىنشى راكەتكاسى اتانادى. ول ايەلدەر تەننيس قاۋىمداستىعى (WTA) رەيتينگىنىڭ توبەسىنەن ءدال سوبولەنكونى ىعىستىرادى.
US Open فينالى 12-دەن 13 قىركۇيەككە قاراعان ءتۇنى وتەدى، باستالۋى — قازاقستاندىق ۋاقىتپەن 01:00. بۇعان دەيىن رىباكينا ەكى ۇلكەن دۋلىعا ءتۋرنيرىن — ۋيمبلدون-2022 مەن Australian Open — 2026 جەڭىپ العان.