قازاقستان تەننيس فەدەراسياسىنىڭ پرەزيدەنتى بولات وتەمۇراتوۆ ەلەنا رىباكينانىڭ US Open جارىسىندا العاش رەت جارتىلاي فينالعا شىعۋىن تاريحي جەتىستىك دەپ باعالادى، دەپ حابارلايدى infohub.kz.
وسى ناتيجەنىڭ ارقاسىندا قازاقستاندىق سپورتشى ايەلدەر تەننيس قاۋىمداستىعىنىڭ الەمدىك رەيتينگىندە تۇڭعىش رەت كوش باسىنا شىعىپ، ۇلكەن دۋلىعا ءتۋرنيرى اياقتالعان سوڭ الەمنىڭ ءبىرىنشى راكەتكاسى اتانادى.
«بۇل تابىستىڭ ارتىندا ەلەنا مەن ونىڭ بۇكىل كومانداسىنىڭ زور ەڭبەگى، تالانتى، مىنەزدىڭ بەرىكتىگى مەن جىلدار بويعى ماقساتكەرلىگى تۇر. بۇل — ميلليونداعان قازاقستاندىقتى بىرىكتىرىپ، شابىتتاندىراتىن جەڭىس. بۇگىنگى جەتىستىك ءاربىر جانكۇيەرىمىز ءۇشىن ەرەكشە ءسات بولاتىنىنا جانە سپورتقا ەندى عانا قادام باسىپ جاتقان مىڭداعان بالاعا ۇلگى بولاتىنىنا سەنىمدىمىن. ەلەنا قازاقستان وكىلىنىڭ الەمدەگى ۇزدىك بولا الاتىنىن دالەلدەدى. بۇل — ەلىمىزدىڭ حالىقارالىق سپورت ارەناسىنداعى بەدەلىن نىعايتاتىن زور ماقتانىش. قازاقستان تەننيس فەدەراسياسى اتىنان بارلىق قازاقستاندىقتاردى وسى ايتۋلى تاريحي جەتىستىكپەن قۇتتىقتايمىن!» — دەدى وتەمۇراتوۆ.
بۇعان دەيىن رىباكينانىڭ ءوزى ناتيجەسىنە العاش رەت پىكىر ءبىلدىرىپ، US Open كەلەسى ماچىنا كوڭىل بولۋگە تىرىساتىنىن ايتقان ەدى. جارتىلاي فينالدا قازاقستاندىق تەننيسشى امەريكالىق كوكو گاۋفف نەمەسە رەسەيلىك ميررا اندرەەۆامەن كەزدەسەدى.