سەرەنا مەن ۆينۋس ۋيليامسپەن جۇمىس ىستەگەن امەريكاندىق تەننيس جاتتىقتىرۋشىسى ريك ماچچي ەلەنا رىباكينانىڭ «ۇلكەن دۋلىعا» تۋرنيرلەرىندە جەڭىسكە جەتۋىنە جانە الەمدىك رەيتينگتىڭ ءبىرىنشى ساتىسىنا كوتەرىلۋىنە مۇمكىندىك بەرگەن ءۇش قاسيەتىن اتادى، دەپ حابارلايدى infohub.kz سايتى.
مامان ءبىرىنشى ارتىقشىلىق دەپ ارتقى سىزىقتاعى سوققىلاردىڭ ساپاسىن سانايدى. ماچچي قازاقستاندىق تەننيسشىنىڭ فورحەندى مەن بەكحەندىن ەرەكشە اتاپ، ۇستاۋدىڭ سالىستىرمالى قاراپايىم تەحنيكاسى ارقىلى ارتىق قوزعالىسسىز قۋات وندىرۋگە مۇمكىندىك الاتىنىن جەتكىزدى.
«رىباكينا WTA تۋرىنداعى ءۇش ماڭىزدى كريتەريگە ساي كەلەدى، وسىنىڭ ءوزى «ۇلكەن دۋلىعا» تۋرنيرلەرىندە جەڭىسكە جەتىپ، الەمنىڭ ءبىرىنشى راكەتكاسى اتانۋعا جەتكىلىكتى. بىرىنشىدەن، ول دوپتى ەليتالىق دەڭگەيدە تازا سوعادى. ونىڭ باستى كوزىرلەرى – فورحەند پەن بەكحەند، ال قاراپايىم ۇستاۋلار قۋاتتى وڭاي جاساۋعا مۇمكىندىك بەرەدى»، – دەپ جازدى ماچچي ح الەۋمەتتىك جەلىسىندە.
ەكىنشى فاكتور رەتىندە امەريكالىق مامان رىباكينانىڭ بەرىسىن اتادى. ونىڭ باعاسىنشا، ونىڭ قوزعالىسى بيومەحانيكا تۇرعىسىنان ءىس جۇزىندە ءمىنسىز قۇرىلعان.
«ونىڭ بەرىسى بيومەحانيكالىق تۇرعىدان ءىس جۇزىندە ءمىنسىز – اياق جۇمىسىنان باستاپ. قارماۋ كەزىندە راكەتكا ۇنەمى وڭ جاق جاۋىرىننىڭ قاسىنان وتەدى، سونىڭ ارقاسىندا قاراپايىم، قايتالاناتىن جانە وڭتايلى لاقتىرۋ قوزعالىسى شىعادى»، – دەپ اتاپ ءوتتى جاتتىقتىرۋشى.
ءۇشىنشى ارتىقشىلىق دەپ ماچچي قازاقستاندىق تەننيسشىنىڭ پسيحولوگياسىن سانايدى. ول ونىڭ سابىرلىعىن جانە بۇل رەتتە ماچ بارىسىندا قاجەتتى قارقىندىلىقتى ساقتاي الاتىنىن ەرەكشەلەدى.
«ونىڭ ويلاۋى – سالقىنقاندى، سابىرلى جانە جيناقى، ءبىراق سونىمەن بىرگە ول قۋاتتى كۇيدە قالادى. كوپ ۋاقىتتا ول بارىنشا تيىمدىلىك ءۇشىن ءمىنسىز كۇيدە بولادى»، – دەپ قوستى مامان.
ءماچچيدىڭ ايتۋىنشا، وسى قاسيەتتەردىڭ ۇيلەسىمى رىباكينانىڭ وزىندىك «تابىس فورمۋلاسىنا» اينالعان، ال الەمنىڭ ءبىرىنشى راكەتكاسى مارتەبەسى ونىڭ سەنىمدىلىگىن ودان ءارى ارتتىرادى.
ريك ماچچي – امەريكاندىق تەننيس جاتتىقتىرۋشىسى، USPTA داڭق زالىنىڭ مۇشەسى. مانسابىنىڭ ءار كەزەڭىندە ول سەرەنا مەن ۆينۋس ۋيليامسپەن، ەندي رودديكپەن، دجەننيفەر كاپرياتيمەن جانە ماريا شاراپوۆامەن جۇمىس ىستەگەن – وسى بەسەۋى كەيىن الەمنىڭ ءبىرىنشى راكەتكاسى اتاندى. ماچچي سونداي-اق جاتتىقتىرۋشىلىق جۇمىسى ءۇشىن USPTA ناگرادالارىن بىرنەشە رەت العان.
ەسكە سالايىق، US Open-2026 فينالىندا رىباكينا ارينا سوبولەنكونى 6:4، 5:7، 6:2 ەسەبىمەن جەڭدى. بۇل تيتۋل 27 جاستاعى سپورتشى ءۇشىن US Open-تەگى العاشقى، ال «ۇلكەن دۋلىعا» تۋرنيرلەرىندەگى ۋيمبلدون-2022 مەن Australian Open-2026 كەيىنگى ءۇشىنشى تيتۋلى بولدى.