سەمەيدە جۇرگىزۋشى دۇرىس تۇراقتاماعانى ءۇشىن سالىنعان ايىپپۇل قاۋلىسىنا ءساتتى شاعىمداندى — اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوت اۆتوكولىك يەسىنىڭ جاعىنا شىعىپ، ءىس بويىنشا ءىس جۇرگىزۋدى توقتاتتى، دەپ حابارلايدى infohub.kz سايتى.
اباي وبلىسى سوتتارىنىڭ رەسمي Telegram-ارناسىندا جازىلعانداي، ەر ادام پاترۋلدىك پوليسيا قىزمەتكەرلەرىنىڭ ونى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 597-بابىنىڭ 1-بولىگى بويىنشا اكىمشىلىك جاۋاپكەرشىلىككە تارتۋ تۋرالى قاۋلىسىنا شاعىم تۇسىرگەن. بۇل باپ كولىك قۇرالدارىن توقتاتۋ نەمەسە تۇراقتاۋ ەرەجەلەرىن بۇزعانى ءۇشىن جازانى كوزدەيدى.
شاعىمىندا جۇرگىزۋشى شىعارىلعان شەشىممەن كەلىسپەيتىنىن ءبىلدىرىپ، پودەزد ماڭىنداعى تۇراق ءۇشىن سالىنعان ايىپپۇلدى نەگىزسىز دەپ سانايتىنىن ءتۇسىندىردى.
سوت وتىرىسى بارىسىندا ءىس ماتەريالدارىندا اۆتوكولىكتىڭ بەلگىلەنگەن ەرەجەلەردى بۇزا وتىرىپ توقتاعانىن راستايتىن دالەلدەر جوق ەكەنى، سونداي-اق بولجامدى قۇقىق بۇزۋشىلىقتىڭ ورنى دا كورسەتىلمەگەنى انىقتالدى.
تاراپتاردىڭ دالەلدەرىن تىڭداعان سوت، بەلگىلەنگەن تارتىپپەن جينالعان دالەلدەرسىز پوليسيا قىزمەتكەرلەرىنىڭ بولجامدارى جۇرگىزۋشىنىڭ اكىمشىلىك قۇقىق بۇزۋشىلىق جاساعانى تۋرالى سوت شەشىمىنىڭ نەگىزى بولا المايدى دەگەن قورىتىندىعا كەلدى.
كىناسىزدىك پرەزۋمپسياسى قاعيداتىن باسشىلىققا الا وتىرىپ، سەمەيدىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى اكىمشىلىك قۇقىق بۇزۋشىلىق تۋرالى ءىس بويىنشا ءىس جۇرگىزۋدى توقتاتتى.