سەمەيدە 45 جاستاعى ەر ادام ازاماتتارعا «تانىستارىم ارقىلى كومەكتەسەمىن» دەپ ۋادە بەرىپ، بىرنەشە رەت ءىرى مولشەردە الاياقتىق جاساعانى ءۇشىن كىنالى دەپ تانىلىپ، ءتورت جىلعا باس بوستاندىعىنان ايىرىلدى. بۇل تۋرالى infohub.kz سايتى حابارلايدى.
اباي وبلىسى پوليسيا دەپارتامەنتىنىڭ رەسمي Telegram-ارناسىندا جازىلعانداي، ايىپتاۋ ۇكىمىن سەمەيدىڭ قىلمىستىق ىستەر جونىندەگى اۋدانارالىق سوتى شىعاردى.
«2020-2022 جىلدارى 45 جاستاعى ەر ادام ازاماتتاردىڭ سەنىمىن تەرىس پايدالانىپ، ءتۇرلى سىلتاۋمەن ولاردىڭ اقشاسىن يەمدەنىپ العانى انىقتالدى»، — دەدى اباي وبلىسى پد-دا.
ول جابىرلەنۋشىلەردىڭ بىرىنە مەملەكەتتىك باعدارلامالار اياسىندا ءتيىمدى باعامەن پاتەر الۋعا كومەكتەسە الاتىن تانىستارى بار ەكەنىن ايتقان. ودان اقشا الىپ، شىن مانىندە ۋادەسىن ورىنداۋعا نيەتتەنبەگەن.
كەيىن كولىك ساتىپ الىپ، ونى قايتا ساتۋ، قۇرىلىس ماتەريالدارىن الۋ جانە وزگە دە ماسەلەلەردى شەشۋ سىلتاۋىمەن جابىرلەنۋشىدەن قايتا اقشا العان. وعان كەلتىرىلگەن شىعىننىڭ جالپى سوماسى 9 ملن 820 مىڭ تەڭگەنى قۇرادى.
تاعى ءبىر جابىرلەنۋشىگە ەر ادام ارزان باعامەن جىلجىمايتىن م ۇلىك الۋعا، مۇگەدەكتىك راسىمدەۋگە جانە مەملەكەتتىك باعدارلاما بويىنشا تۇرعىن ءۇي كەزەگىنە تۇرۋعا كومەكتەسۋگە مۇمكىندىگى مەن بايلانىستارى بار ەكەنىن ايتقان. وسى سىلتاۋلارمەن ول جالپى سوماسى 5 ملن 280 مىڭ تەڭگە اقشا العان.
سەمەيلىك ەر ادامنىڭ كىناسى سوتتا زەرتتەلگەن دالەلدەردىڭ جيىنتىعىمەن، ونىڭ ىشىندە جابىرلەنۋشىلەر مەن كۋاگەرلەردىڭ جاۋاپتارىمەن، بانكتىك اۋدارىمدار مەن ءۇزىندى كوشىرمەلەرمەن راستالدى.
سوت وعان 4 جىلعا باس بوستاندىعىنان ايىرۋ جازاسىن تاعايىندادى.
سونىمەن قاتار سوت جابىرلەنۋشىلەردىڭ پايداسىنا تيىسىنشە 9 ملن 820 مىڭ جانە 5 ملن 130 مىڭ تەڭگە ماتەريالدىق شىعىندى ءوندىرىپ الدى (جالپى سوماسى 14 ملن 950 مىڭ تەڭگە).
ۇكىممەن سوتتالعان ادامنان جابىرلەنۋشىلەردى وتەماقى قورىنا 20 اەك — 61 260 تەڭگە مولشەرىندە ءماجبۇرلى تولەم ءوندىرىپ الۋ دا بەلگىلەندى.