قازاقستاندىق تەننيسشى الەكساندر شەۆچەنكو (الەمدەگى 97-راكەتكا) اقش-تىڭ اشىق بىرىنشىلىگىندەگى ونەرىن ءبىرىنشى اينالىمدا-اق اياقتادى. ول حورۆاتيالىق دينو پريجميچتەن (101) جەڭىلىپ قالدى. 3 ساعات 55 مينۋتقا سوزىلعان ماچ حورۆاتيالىقتىڭ پايداسىنا 2:6، 6:3، 6:3، 5:7، 7:5 ەسەبىمەن اياقتالدى، دەپ حابارلايدى infohub.kz.
شەۆچەنكو كەزدەسۋدى سەنىمدى باستاپ، ءبىرىنشى سەتتى 6:2 ەسەبىمەن ۇتقان ەدى. الايدا كەيىن قارسىلاسىنا ەكى پارتيانى قاتارىنان 3:6 ەسەبىمەن بەرىپ قويدى. ءتورتىنشى سەتتە قازاقستاندىق ويىن بارىسىن وزگەرتە الدى: پريجميچ ماچقا پوداچا جاساپ جاتقاندا، شەۆچەنكو كەرى برەيك جاساپ، پارتيانى 7:5 ەسەبىمەن ءوز پايداسىنا شەشتى.
شەشۋشى بەسىنشى سەتتە شەۆچەنكو ەكى ماچبولعا يە بولدى، ءبىراق ەكەۋىن دە پايدالانا المادى. سوڭىندا ساتتىلىك ءپريجميچتىڭ جاعىندا بولدى، ول ءوز مۇمكىندىگىن پايدالانىپ، پارتيانى 7:5 ەسەبىمەن ۇتتى. وسىلايشا، تەننيسشىلەردىڭ العاشقى كەزدەسۋى 21 جاستاعى حورۆاتيالىقتىڭ جەڭىسىمەن اياقتالدى.
ماچ بارىسىندا شەۆچەنكو 14 ەيس جاسادى، جەتى قوس قاتەلىك جىبەردى جانە 15 برەيك-پوينتتىڭ التاۋىن پايدالاندى. پريجميچتە سەگىز ەيس، توعىز قوس قاتەلىك جانە 11 برەيك-پوينتتىڭ التاۋى ءساتتى بولدى.
شەۆچەنكو ءۇشىن US Open ءبىرىنشى اينالىمنان كەيىن اياقتالدى. پريجميچ ەكىنشى اينالىمدا كوۋلمان ۆون – توممي پول جۇبىنىڭ جەڭىمپازىمەن كەزدەسەدى.
قازاقستاندىقتار اراسىندا جەكە سىندا تاعى ءۇش تەننيسشى كۇرەستى جالعاستىرادى. الەكساندر بۋبليك (16) ءبىرىنشى اينالىمدا امەريكالىق دجەففري ۆۋلفپەن (248) وينايدى. ەلەنا رىباكينا (2) امەريكالىق تەيا فرودينمەن (580)، ال يۋليا پۋتينسەۆا (80) شۆەيساريالىق بەليندا بەنچيچپەن (12) كەزدەسەدى.
اقش-تىڭ اشىق بىرىنشىلىگى – حاردتا وتەتىن جىل سايىنعى «ۇلكەن دۋلىعا» ءتۋرنيرى، كۇنتىزبەلىك جىلداعى ءتورت مەيدجوردىڭ سوڭعىسى. العاش رەت 1881 جىلى تامىزدا وتكەن US Open، ميكست ءتۋرنيرىنىڭ كەيىنگە شەگەرىلۋىنە بايلانىستى ەكىنشى جىل قاتارىنان ءبىر اپتا ەرتە باستالادى. جالپى جۇلدە قورى – $108 ملن – مەيدجورلار ءۇشىن رەكوردتىق كورسەتكىش. 1978 جىلدان بەرى ماچتار نيۋ-يوركتەگى بيللي دجين كينگ اتىنداعى ۇلتتىق تەننيس ورتالىعىندا وتەدى.
ەرلەر اراسىنداعى قازىرگى چەمپيون – يسپانيالىق كارلوس الكاراس (3)، ول وتكەن جىلعى فينالدا ياننيك سيننەردى 6:2، 3:6، 6:1، 6:4 ەسەبىمەن ۇتقان بولاتىن. ايتپاقشى، الەمنىڭ ءبىرىنشى راكەتكاسى يتاليالىق تىزە جاراقاتىنا بايلانىستى US Open-2026-دان باس تارتتى. ايەلدەر اراسىندا 2025 جىلعى جەڭىمپاز بەلارۋس ارينا سوبولەنكو بولدى، ول فينالدا امەريكالىق اماندا انيسيموۆانى 6:3، 7:6 (7:3) ەسەبىمەن ۇتتى.