ەكىنشى ورتا سالماقتاعى دۇنيەجۇزىلىك بوكس ۇيىمىنىڭ (WBO) الەم چەمپيونى بريتاندىق حامزا شيراز قازاقستاندىق جانىبەك ءالىمحان ۇلىنا قارسى مىندەتتى تيتۋل قورعاۋ جەكپە-جەگىنە دايىن ەكەنىن مالىمدەدى. بريتاندىق بوكسشىنىڭ ايتۋىنشا، ول قارسىلاسپەن ايقاستىڭ قارجىلىق شارتتارى ءتيىمدى بولسا عانا رينگكە شىعادى، دەپ حابارلايدى infohub.kz سايتى.
«ءبىز جۇدىرىقتاسامىز، جەكپە-جەككە كەلىسەمىز. كەتتىك، باستايىق»، — دەپ كەلتىرەدى شيرازدىڭ ءسوزىن The Ring باسىلىمى باس رەداكتور ريك رينوعا بەرگەن سۇحباتىندا.
ايتا كەتەيىك، باستاپقىدا شيراز WBO-نىڭ ءالىمحان ۇلىن مىندەتتى ۇمىتكەر ەتىپ تاعايىنداۋ شەشىمىن سىناعان بولاتىن. ەندى بريتاندىق بوكسشى قازاقستاندىقپەن رينگتە كەزدەسۋگە دايىن ەكەنىن ءبىلدىردى.
الايدا تاراپتار ازىرگە جەكپە-جەك وتكىزۋ شارتتارىن كەلىسە العان جوق. شيرازدىڭ ايتۋىنشا، ول DAZN ستريمينگتىك سەرۆيسىنەن، ءوزىنىڭ پروموۋتەرلىك كومپانياسى Queensberry Promotions-تان نەمەسە ءالىمحان ۇلىنىڭ مۇددەسىن قورعايتىن Top Rank پروموۋتەرلىك ۇيىمىنان ۇسىنىس الماعان.
«ءبىز كاسىبي بوكسشىمىز، لايىقتى قالاماقى ءۇشىن جۇدىرىقتاسامىز»، — دەپ اتاپ ءوتتى بريتانيالىق.
كوماندالار تىكەلەي كەلىسىمگە كەلە الماعاندىقتان، WBO پروموۋتەرلىك ساۋدا-ساتتىقتى 16 قىركۇيەككە بەلگىلەدى. ەڭ تومەنگى رۇقسات ەتىلگەن مولشەرلەمە 300 مىڭ اقش دوللارىن قۇرايدى.
شيراز الىمحان ۇلىمەن جەكپە-جەكتى مانسابىنداعى ەڭ ءىرى ايقاس دەپ سانايدى، ءبىراق ساۋدا-ساتتىقتىڭ قورىتىندى سوماسى مۇنداي جەكپە-جەك وتكىزۋگە جەتكىلىكسىز بولۋى مۇمكىن دەپ قاۋىپتەنەدى. بريتاندىقتىڭ ايتۋىنشا، جاقسى قارجىلىق ۇسىنىس تۇسسە، قازاقستاندىقپەن جەكپە-جەككە ونىڭ تاراپىنان ەشقانداي كەدەرگى بولمايدى.
شيراز ەكىنشى ورتا سالماقتاعى WBO بەلبەۋىن يەلەنەدى جانە كاسىبي رەكوردى مىناداي: 24 جەڭىس، ءبىر تەڭ ويىن جانە بىردە-بىر جەڭىلىس، ونىڭ 19 جەڭىسىن نوكاۋتپەن العان. سوڭعى جەكپە-جەگىندە 25 شىلدەدە بريتانيالىق سيمون زاحەنحۋبەردى تورەشىلەردىڭ كوپشىلىك شەشىمىمەن جەڭدى.
ەسكە سالايىق، بۇعان دەيىن ءالىمحان ۇلى ساۋد ارابياسىنىڭ ويىن-ساۋىق ىستەرى جونىندەگى باس باسقارماسىنىڭ ءتوراعاسى تۇركي ال-شەيحكە جاريا تۇردە جولداۋ جاساپ، شيرازبەن جەكپە-جەك ۇيىمداستىرۋعا كومەكتەسۋىن سۇراعان ەدى.
33 جاستاعى ءالىمحان ۇلى 2026 جىلدىڭ جازىندا ەكىنشى ورتا سالماققا اۋىسىپ، وسى ءۇشىن ورتا ديۆيزيونداعى WBO چەمپيوندىق بەلبەۋىنەن باس تارتتى. ول كاسىبي رينگتە جەڭىلىس كورمەگەن — 17 جەكپە-جەكتە 17 جەڭىس، ونىڭ 12ء-سى نوكاۋتپەن.