شىعىس قازاقستان وبلىسىندا شاحتەرلەر مەن ءقاۋىپتى مەتاللۋرگيا وندىرىستەرىنىڭ جۇمىسشىلارىن قۇتقارۋعا ارنالعان اۆاريالىق كاپسۋلا ازىرلەنۋدە، دەپ حابارلايدى infohub.kz سايتى.
مۇنداي تەحنولوگيالار ءبىرقاتار ەلدەردە، سونىڭ ىشىندە رەسەي مەن اۆستراليادا قولدانىلىپ ءجۇر. قازاقستاندىق ينجەنەرلەر وتاندىق كاپسۋلا ءبىر ۋاقىتتا 20-دان استام ادامدى سىيدىرا الادى دەپ ەسەپتەيدى.
قۇرىلىمدى بولاتتان جاساپ، اۆتونومدى تىرشىلىكتى قامتاماسىز ەتۋ جۇيەلەرىمەن جابدىقتاۋ جوسپارلانۋدا. قۇلاۋ نەمەسە باسقا اپات كەزىندە كاپسۋلا ادامداردى سىنىقتاردان قورعاۋى ءتيىس. ىشىندە وتتەگى قورى، دارى-دارمەكتەر جانە شامامەن 36 ساعات اۆتونومدى جۇمىسقا ەسەپتەلگەن جابدىق قاراستىرىلادى.
ازىرگە ماماندار تاجىريبەلىك ۇلگىلەردى جاساپ جاتىر. بولاشاقتا تەحنولوگيانى ونەركاسىپتىك كاسىپورىندارعا ەنگىزۋگە دايىن، الايدا جوبانىڭ جۇزەگە اسۋى تاۋ-كەن كومپانيالارىنىڭ قىزىعۋشىلىعىنا بايلانىستى بولادى.
جوبانىڭ ازىرلەۋشىلەرىنىڭ ءبىرى بولات سىپتايەۆ ءىرى كاسىپورىنداردا مۇنداي ءبىر كاپسۋلانىڭ جەتكىلىكسىز بولاتىنىن ايتادى.
«ءبىر اۋىسىمدا 600-دەن استام ادام تۇسەدى، ياعني ءبىر كاپسۋلا مۇلدەم جەتپەيدى. مەنىڭ تۇسىنىگىمدە، اۆاريالىق قۇتقارۋ كاپسۋلاسى — بۇل عيماراتتاعى ءورت سوندىرگىش سياقتى: ولاردى بىرنەشە جەرگە ورنالاستىرۋ قاجەت»، — دەدى ول.
بار مالىمەتتەرگە سايكەس، وتكەن جىلى قازاقستاننىڭ تاۋ-كەن ءوندىرۋ سەكتورىندا 2،5 مىڭنان استام جازاتايىم وقيعا بولعان. ازىرلەۋشىلەر جاڭا جۇيە شاحتالار مەن مەتاللۋرگيا كاسىپورىندارى قىزمەتكەرلەرىنىڭ قاۋىپسىزدىگىن ارتتىرۋعا مۇمكىندىك بەرەدى دەپ سەنەدى.