شىمكەنتتە تۇرعىندار اۋاداعى جاعىمسىز يىسكە جاپپاي شاعىمدانىپ جاتىر، ال لاستانۋ كوزىن انىقتاۋعا كىرىسىپ كەتتى. قالا اكىمى ەكولوگتارعا كىنالىنى تابۋدى تاپسىردى، دەپ حابارلايدى infohub.kz سايتى.
قالا تۇرعىندارى قولايسىزدىقتى قانداي دا ءبىر كاسىپورىننان كورىپ وتىر. «كەيدە دەمالعىم كەلەدى، جاتىپ الايىن دەيمىن، ءبىراق تىنىس الا المايمىن. تەرەزە اشىق ۇيىقتايمىز عوي. ءبىراق ۇنەمى كۇيىك، ءتۇتىن ءيىسى شىعادى. كەشكە قاراي قاتتىراق سەزىلەدى. ءيىسى ءارتۇرلى، ءبىراق ءاردايىم جاعىمسىز»، — دەدى جەرگىلىكتى تۇرعىن اسەل مالىك.
تۇرعىنداردىڭ ايتۋىنشا، جاعداي جاز باسىنان ناشارلاعان — اسىرەسە تۇندە تىنىس الۋ قيىنداعان. جەرگىلىكتى ەكولوگتار الاڭداۋعا نەگىز جوق دەپ سەندىرىپ كەلەدى. قالادا اۋا ساپاسىن باقىلايتىن التى بەكەت جۇمىس ىستەيدى، ولار شەكتەن تىس كورسەتكىشتەردى تىركەمەگەن. الايدا بيىل 37 كاسىپورىن شىعارىندى كولەمىن اسىرعانى ءۇشىن ايىپپۇل ارقالادى. ماماندار قالا تۇرعىندارىنىڭ سەزىمىن جوققا شىعارمايدى، ءبىراق اۋاداعى لاستاۋشى زاتتاردىڭ مولشەرىن تىم جوعارى ءارى ءقاۋىپتى دەپ سانامايدى.
«ءبىز مۇنى يندۋستريالىق ايماقتا كۇن سايىن اشىلىپ جاتقان جاڭا كاسىپورىندارمەن بايلانىستىرامىز. مىسالى، 2023 جىلدان بۇگىنگە دەيىن جالپى شىعارىندى 31 مىڭنان 40 مىڭ تونناعا دەيىن ءوستى. ءيىستى جوققا شىعارمايمىز. ول بار، ءبىراق قالا قۇراۋشى كاسىپورىندار دا بار. زياندى شىعارىندىسىز كاسىپورىن بولمايدى»، — دەدى شىمكەنت بويىنشا ەكولوگيا دەپارتامەنتىنىڭ باسشىسى ەرماحان قوزىبايەۆ.