شىمكەنتتە 21 جاستاعى نۇراحمەت بەردىباي TikTok-تە تىكەلەي ەفير جۇرگىزىپ، وندا كورەرمەننىڭ قارالى كۇن تۋرالى سۇراعىنا جاۋاپ بەرگەندە، سوت قوعامعا قۇرمەتسىزدىك جانە قوعامدىق ءتارتىپتى بۇزۋ دەپ باعالاعان سوزدەر ايتقانى ءۇشىن 10 تاۋلىككە قامالدى. بۇل تۋرالى infohub.kz سايتى حابارلايدى.
ترانسلياسيانى پوليسيا قىزمەتكەرلەرى الەۋمەتتىك جەلىلەردى مونيتورينگىلەۋ بارىسىندا انىقتاعان. تىكەلەي ەفيرگە بەردىبايمەن بىرگە 22 جاستاعى ابزال مۇسىرمانقۇل مەن باقداۋلەت مۇستافا قاتىسقان.
«ترانسلياسيا كەزىندە شىمكەنتتىڭ 21 جاستاعى تۇرعىنى نۇراحمەت بەردىباي كورەرمەننىڭ قارالى كۇنگە قاتىستى سۇراعىنا جاۋاپ بەرىپ، قوعامعا ايقىن قۇرمەتسىزدىك تانىتىپ، قوعامدىق ءتارتىپتى بۇزاتىن سوزدەر ايتتى»، — دەپ كەلتىرەدى پوليسيا.
سوت بەردىبايعا 10 تاۋلىك اكىمشىلىك قاماۋ جازاسىن تاعايىندادى. سونىمەن قاتار ۇشەۋىنە دە قوعامعا جات مىنەز-ق ۇلىققا جول بەرىلمەيتىنى تۋرالى رەسمي ەسكەرتۋ جاسالدى. ولار ىشكى ىستەر ورگاندارىندا ءبىر اي مەرزىمگە پروفيلاكتيكالىق ەسەپكە دە قويىلدى.
ەسكە سالايىق، 24 قىركۇيەكتە اسكەري-تەڭىز كۇشتەرى كاسپيدە وقۋ-جاۋىنگەرلىك تاپسىرمالاردى ورىنداپ جاتقاندا، كەنەتتەن شىققان داۋىل مەن ەكپىندى جەلدەن 17 اسكەري قىزمەتشى اشىق تەڭىزگە اعىزىلىپ كەتكەن. وقيعا سالدارىنان 14 ادام قازا تاپتى. ساربازداردىڭ قازا تابۋىنا بايلانىستى پرەزيدەنت قاسىم-جومارت توقايەۆ 25 قىركۇيەكتى قازاقستاندا جالپىۇلتتىق قارالى كۇن دەپ جاريالادى.