شىمكەنتتە ورنالاسقان قازاقستان رەسپۋبليكاسى ىشكى ىستەر مينيسترلىگى ۇلتتىق ۇلانىنىڭ 6506 اسكەري بولىمىندە بويى ەكى مەترگە جۋىق قاتارداعى سارباز دەنيس مۋحين مەرزىمدى قىزمەت وتكەرۋدە. ءىىم ۇلتتىق ۇلانىنىڭ رەسمي Telegram-ارناسىندا حابارلانعانداي، 19 جاستاعى اسكەري قىزمەتشى 47ء-شى ولشەمدى اياق كيىم كيەدى، سوندىقتان ارىپتەستەرى ونى ازىلدەپ «گۋلليۆەر» دەپ اتاپ كەتكەن، دەپ جازادى infohub.kz سايتى.
جاس جىگىت الماتى وبلىسىنان مەرزىمدى قىزمەتكە شاقىرىلعان. ول شاقىرىلعانعا دەيىن تالعار پوليتەحنيكالىق كوللەدجىن ءبىتىرىپ، «اۆتوەلەكتريك» ماماندىعىن العان. دەنيس بالا كۇنىنەن سپورتپەن اينالىسادى — كوپ جىلدار بويى ۆولەيبولعا دەن قويعان. ءوزىنىڭ ايتۋىنشا، ءىرى دەنە ءبىتىمى اكەسىنەن دارىعان: توعىزىنشى سىنىپتا-اق 45ء-شى ولشەمدى اياق كيىم كيگەن.
جاڭادان كەلگەن ساربازدىڭ دەنە ەرەكشەلىگى قىزمەتتىڭ العاشقى كۇندەرىنەن-اق بايقالدى. وقۋ پۋنكتىندە وعان لايىقتى بەرس تابىلعانشا بىرنەشە كۇن اسكەري ءبولىم بەرگەن كروسسوۆكامەن جۇرۋگە تۋرا كەلدى. سوڭىندا كيىم-كەشەك قىزمەتى قاجەتتى 47ء-شى ولشەمدى تاۋىپ بەردى. ەندى ەرەكشە ءىرى بەرستەر ۇلان ساربازىنىڭ جابدىعىنىڭ ەڭ كوزگە تۇسەتىن بولشەگىنە اينالدى.
قازىرگى تاڭدا قاتارداعى سارباز كۇن سايىن شىمكەنت كوشەلەرىندە پاترۋلدەۋ جۇرگىزىپ، قالا تۇرعىندارى مەن قوناقتارىنىڭ قوعامدىق ءتارتىبى مەن قاۋىپسىزدىگىن قامتاماسىز ەتۋدە. سونىمەن قاتار دەنيس ارىپتەستەرىنىڭ اراسىندا تەك بويىمەن عانا ەرەكشەلەنبەيدى. ءىىم ۇلتتىق ۇلانىنىڭ مالىمدەۋىنشە، ول قازاق ءتىلىن جاقسى مەڭگەرگەن جانە كۇندەلىكتى قىزمەتتە ونى ەركىن قولدانادى. بۇگىندە جۇرگىنشىلەر اسكەري كيىمدەگى ۇزىن بويلى ۇلانعا ءجيى نازار اۋدارادى، ال ارىپتەستەرى ونى ءوزارا ازىلدەپ «گۋلليۆەر» دەپ اتايدى.