66 جاستاعى امەريكالىق سكەيتبوردشى دجۋدي وياما الەمدەگى ەڭ كارى بەلسەندى كاسىبي سپورتشى رەتىندە رەسمي تانىلدى، دەپ حابارلايدى infohub.kz.
سپورتشى گيننەسس رەكوردتار كىتابىنىڭ 2027 جىلعى جاڭا باسىلىمىنا ەندى. ول العاشقى رەكوردىن 2024 جىلى 64 جاسىندا 326 كۇندىك كەزىندە ورناتقان ەدى، سودان بەرى حالىقارالىق جارىستارعا قاتىسىپ، رەكوردىن جاڭارتىپ كەلەدى.
وياما سكەيتبوردينگكە 13 جاسىندا تۋعان قالاسى سانتا-كرۋزدا (كاليفورنيا) اۋەستەنگەن، اعاسى ۇيگە ەڭبەك ساباعىندا جاسالعان تاقتانى اكەلگەن كەزدە. 1970ء-شى جىلدارى بۇل سپورتتا ايەلدەر ساناتى ءىس جۇزىندە بولماعاندىقتان، ول ەرلەر تۋرنيرلەرىندە جارىسقان. 1978 جىلى دجۋدي "Santa Cruz Skate" كومانداسىنىڭ قۇرامىنا كىرىپ، سكەيتبوردينگتە رەسمي دەمەۋشىلىك كەلىسىمشارت العان العاشقى ايەلدەردىڭ ءبىرى بولدى.
ءقازىر وياما جوعارى جىلدامدىق پەن يكەمدىلىكتى قاجەت ەتەتىن سلالوم جانە جالپى جارىس باعىتتارىنا ماماندانعان. قازان ايىندا ول 67 جاسقا تولۋىنا از ۋاقىت قالعاندا پاراگۆايدا وتەتىن الەمدىك سكەيت ويىندارىنا قاتىسۋدى جوسپارلاپ وتىر. سپورتشى جارىستاردان بولەك، تالىمگەرلىكپەن اينالىسىپ، تاۋەكەل توبىنداعى وتباسىلاردىڭ بالالارىنا سكەيتبوردتار تاراتۋ سياقتى قايىرىمدىلىق جوبالارعا قاتىسادى.