الەمنىڭ ءبىرىنشى راكەتكاسى ارينا سوبولەنكو اقش اشىق چەمپيوناتىندا تيتۋلىن قورعاۋدى جالعاستىرۋدا. شيرەك فينالدا بەلارۋس تەننيسشىسى چەحيالىق التىنشى راكەتكا ليندا نوسكوۆانى 7:6 (7:1)، 3:6، 7:6 (10:7) ەسەبىمەن تىزە بۇكتىردى، دەپ حابارلايدى infohub.kz.
ارتۋر ەش اتىنداعى كورتتاعى ماچ 2 ساعات 22 مينۋتقا سوزىلدى. ءبىرىنشى سەت تاي-برەيكتە اياقتالىپ، سوبولەنكو قارسىلاسىنا ءبىر عانا ۇپاي بەردى — 7:1. ەكىنشى پارتيادا نوسكوۆا برەيك جاساپ، سەتتەر بويىنشا ەسەپتى تەڭەستىردى. ايتا كەتەيىك، بۇعان دەيىن بەلارۋس تەننيسشىسى تۋرنيردە بىردە-بىر سەت ۇتىلماعان ەدى.
شەشۋشى پارتيادا قارسىلاستار قايتادان تاي-برەيككە جەتتى، ءبىراق بۇل جولى جەڭىمپاز ون ۇپايعا دەيىنگى فورماتتا انىقتالدى. سوبولەنكو باسىم ءتۇستى — 10:7، وسىلايشا جارتىلاي فينالعا جولداما الدى.
ماچ ستاتيستيكاسى نوسكوۆانىڭ ءبىرىنشى راكەتكادان بىرنەشە كورسەتكىش بويىنشا وزىپ تۇرعانىن كورسەتەدى: چەح تەننيسشىسى 18 ەيس جاسادى (سوبولەنكودا 12)، 46 ۆيننەر (قارسىلاسىندا 42) جانە از قاتەلىك جىبەردى — 25-كە قارسى 30. نوسكوۆا التى برەيك-پوينتتىڭ ۇشەۋىن پايدالانسا، سوبولەنكو توعىزدىڭ ەكەۋىن عانا ىسكە اسىردى.
دەگەنمەن، بەلارۋس تەننيسشىسى ەكىنشى پوداچادا ايتارلىقتاي جاقسى ويناپ، مۇنداي روزىگرىشتاردىڭ 61 پايىزىن ۇتىپ الدى (قارسىلاسىندا 43 پايىز). جالپى ۇپايلار اراقاتىناسى سوبولەنكونىڭ پايداسىنا 113:105 بولدى.
جارتىلاي فينالدا US Openء-تىڭ قازىرگى چەمپيونى دجەسسيكا پەگۋلا مەن ەمما ناۆاررو اراسىنداعى امەريكاندىق شيرەك فينال جەڭىمپازىمەن كەزدەسەدى.
بۇل رەتتە WTA رەيتينگىنىڭ ءبىرىنشى ساتىسىنا قاتىستى ينتريگا ساقتالۋدا. ەكىنشى ورىندا تۇرعان ەلەنا رىباكينا شيرەك فينالدا چجەن سينۆەنمەن وينايدى. ەگەر قازاقستاندىق تەننيسشى جەڭىسكە جەتىپ، جارتىلاي فينالعا شىقسا، ول سوبولەنكونىڭ US Open-تەگى ودان ءارى ناتيجەسىنە قاراماستان، مانسابىندا العاش رەت الەمنىڭ ءبىرىنشى راكەتكاسى اتانادى.