بەلارۋس تەننيسشىسى ارينا سوبولەنكو اقش اشىق چەمپيوناتىنىڭ فينالدىق ماچى اياقتالعان سوڭ قازاقستاندىق ەلەنا رىباكينانى قۇتتىقتادى، دەپ حابارلايدى infohub.kz سايتى.
ماۋسىمداعى سوڭعى ۇلكەن دۋلىعا ءتۋرنيرىنىڭ شەشۋشى كەزدەسۋىندە الەمدىك رەيتينگ كوشباسشىلارى كەزدەستى. رىباكينا جەڭىسكە جەتىپ، مانسابىندا العاش رەت US Open چەمپيونى اتاندى. سوبولەنكو بۇل مەيدجوردى الدىڭعى ەكى ماۋسىمدا جەڭىپ العان بولاتىن.
ماچ بىتىسىمەن بەلارۋس تەننيسشىسى ءوز راكەتكاسىن سىندىردى. سودان كەيىن ول وپەراتورلارعا بىرنەشە رەت بالاعاتتاپ، تۇسىرمەۋدى سۇرادى.
ماراپاتتاۋ راسىمىندە سوبولەنكو رىباكينانى قۇتتىقتاپ، قارسىلاسىنان ماۋسىم سوڭىنا دەيىن جەڭىستى تويلاۋدى ازىلمەن ءوتىندى. الايدا بەلارۋس تەننيسشىسى كوز جاسىن تىيا المادى.
«ءسوز سويلەۋ — ءقازىر مەنىڭ ەڭ سوڭعى قالاۋىم. ءبىراق بارىنشا تىرىسامىن. قولداۋ كورسەتكەندەرىڭىزگە راحمەت! ەكى اپتا بويى سىزدەر ءۇشىن ويناۋ جاعىمدى بولدى. ارينە، كوڭىلىم قالدى، ءبىراق ەلەنانى تاماشا ماۋسىمىمەن جانە وسىنداي ناتيجەلەرىمەن قۇتتىقتاعىم كەلەدى. بۇل تولىعىمەن لايىقتى. ءلاززات الىپ، راحاتتانا بەرىڭىز — بۇگىن، ەرتەڭ جانە ماۋسىم سوڭىنا دەيىن، مەن بىرنەشە تيتۋل جەڭىپ الۋىم ءۇشىن... ءوزىمدى وسىندا ۇيدەگىدەي سەزىندىم. كوماندام مەن دوستارىما العىس ايتامىن. جاقسىراق ويناعىم كەلدى، ءبىراق ەندى كەلەسى جىلى دەپ ۇمىتتەنەمىن»، — دەدى سوبولەنكو.
US Open قورىتىندىسى بويىنشا بەلارۋس تەننيسشىسى ايەلدەر تەننيس قاۋىمداستىعى (WTA) رەيتينگىندە ەكىنشى ورىنعا تۇسەدى. الەمنىڭ ءبىرىنشى راكەتكاسى رىباكينا اتانادى.