بەلارۋس تەننيسشىسى ارينا سوبولەنكو اقش اشىق چەمپيوناتىنىڭ فينالىندا راكەتكاسىن سىندىرىپ، وپەراتورلارعا بالاعات سوزدەر ايتقانى ءۇشىن ايىپپۇل تولەۋى مۇمكىن. بۇل تۋرالى infohub.kz سايتى حابارلايدى.
NUR.KZ Yahoo Sports Australia-عا سىلتەمە جاساپ حابارلاعانداي، سپورتشى ۇلكەن دۋلىعا ءتۋرنيرىنىڭ ەكى ەرەجەسىن بۇزعان. فينالدا جەڭىلىس تاپقان سوڭ ول راكەتكاسىن سىندىرىپ، وزىنە تىم جاقىن كەلگەن وپەراتورلارعا بالاعات سوزدەر ايتقان.
ۇلكەن دۋلىعا تۋرنيرلەرىنىڭ ەرەجەسىنە سايكەس، سىندىرىلعان راكەتكا ءۇشىن ەڭ جوعارى ايىپپۇل 50 مىڭ اقش دوللارىن قۇرايدى — مولشەرى جاعدايعا بايلانىستى. ادەتتە ايىپپۇل الدەقايدا از بولاتىنى اتاپ وتىلگەن، الايدا سوبولەنكو بۇعان دەيىن دە وسىنداي ەرەجە بۇزعانى ءۇشىن قوسىمشا ايىپپۇل الۋى مۇمكىن. ول 2025 جىلى اۆستراليا اشىق چەمپيوناتىنىڭ فينالىنان كەيىن دە راكەتكاسىن سىندىرعان، ال 2023 جىلى اقش اشىق چەمپيوناتىنىڭ فينالىنان كەيىن كيىم اۋىستىراتىن بولمەدە بىرنەشە راكەتكاسىن سىندىرعان.
وپەراتورعا ايتىلعان بالاعات سوزدەرگە كەلەتىن بولساق، ونداي ادەپسىز لەكسيكا ءۇشىن ايىپپۇل ادەتتە 3 مىڭنان 5 مىڭ دوللارعا دەيىن بولادى.
ەسكە سالايىق، ماۋسىمداعى سوڭعى ۇلكەن دۋلىعا ءتۋرنيرىن ەلەنا رىباكينا جەڭىپ الدى. بۇل ناتيجە وعان 9901 ۇپايمەن ايەلدەر تەننيس قاۋىمداستىعىنىڭ (WTA) رەيتينگىندە كوش باستاۋعا مۇمكىندىك بەردى. قازاقستاندىق جەكەلەي سىندا الەمنىڭ ءبىرىنشى راكەتكاسى مارتەبەسىندە دەبيۋت جاسادى. ەكىنشى ورىنعا US Open فينالىندا رىباكيناعا جول بەرگەن بەلارۋس تەننيسشىسى ارينا سوبولەنكو ءتۇستى.
ماچ اياقتالا سالىسىمەن بەلارۋس سپورتشىسى راكەتكاسىن سىندىرىپ، كەيىن وپەراتورلارعا بىرنەشە رەت بالاعات سوزدەر ايتىپ، ءوزىن تۇسىرمەۋدى سۇراعان. WTA رەيتينگتەرى جاڭارعان سوڭ قازاقستاندىق رەسمي تۇردە الەمدەگى №1 اتاندى.