قازاقستاندىق كاراتيست سوفيا بەرۋلسەۆا جاپونيادا ءوتىپ جاتقان XX جازعى ازيا ويىندارىندا ەل قورجىنىنا ءتورتىنشى التىن مەدالدى سالدى، دەپ حابارلايدى infohub.kz سايتى.
25 جاستاعى سپورتشى 68 كەلىدەن جوعارى سالماق دارەجەسىندە سىنعا ءتۇستى. فينالعا دەيىنگى جولدا ول ساۋد ارابياسىنىڭ وكىلى دينا احمەد موستافانى (9:6) جانە نەپال سپورتشىسى اريكا گۋرۋنگتى (2:1) ۇتتى.
شەشۋشى بەلدەسۋدە بەرۋلسەۆا تايلاند وكىلى مانيۆان بۋتسۋۆانمەن كەزدەستى. ايقاس قازاقستاندىق سپورتشىنىڭ 8:0 ەسەبىمەن مەرزىمىنەن بۇرىن جەڭىسىمەن اياقتالدى.
وسى سالماق دارەجەسىندە قولا مەدالدى موستافا مەن يندونەزيالىق لەيكا ال حۋمايرا لۋبيس جەڭىپ الدى.
بەرۋلسەۆا ازيا ويىندارىنىڭ ەكى دۇركىن چەمپيونى اتاندى. حانچجوۋ-2022 ويىندارىندا ول 61 كەلىگە دەيىنگى سالماق دارەجەسىندە جەڭىسكە جەتكەن بولاتىن. سونداي-اق قازاقستاندىق سپورتشىنىڭ قورجىنىندا توكيوداعى وليمپيادا-2020 قولاسى، الەم چەمپيوناتتارىنىڭ ەكى مەدالى جانە ازيا چەمپيونى اتاعىنىڭ ءۇش تيتۋلى بار.
بەرۋلسەۆانىڭ التىنى قازاقستان قۇراماسى ءۇشىن ازيادا-2026 ويىندارىنداعى ءتورتىنشى مەدال بولدى. بۇعان دەيىن پەدەستالدىڭ ەڭ بيىك ساتىسىنا ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتيست جولامان بيگابىل كوتەرىلگەن ەدى.