قازاقستاندىق التىن ءوندىرۋشى Solidcore Resources جاپونياداعى بەس ۋچاسكەدە گەولوگيالىق بارلاۋعا 25 ملن دوللار جۇمسايدى. بۇل شەشىم كانادالىق Japan Gold Corp كومپانياسىمەن ستراتەگيالىق اليانس اياسىندا قابىلداندى. كەلەشەكتە Solidcore جەكەلەگەن جوبالارداعى ۇلەسىن 80%-عا دەيىن جەتكىزە الادى، دەپ حابارلايدى infohub.kz سايتى.
كومپانيانىڭ 23 قىركۇيەكتەگى حابارلاماسىنا سايكەس، Solidcore حوككايدو مەن كيۋسيۋ ارالدارىنداعى Japan Gold ۋچاسكەلەرىندە ءۇش جىلدىق گەولوگيالىق بارلاۋ باعدارلاماسىن قارجىلاندىرادى. ءبىرىنشى كەزەڭ اياقتالعان سوڭ كومپانيا بارلاۋ ناتيجەلەرىنە قاراي ءبىر نەمەسە بىرنەشە ۋچاسكەدە 49% ۇلەس الا الادى.
ەكىنشى كەزەڭدە Solidcore جوبانىڭ الدىن الا تەحنيكالىق-ەكونوميكالىق نەگىزدەمەسىن دايىنداۋدى قارجىلاندىرسا، ۇلەسىن 70%-عا دەيىن ۇلعايتا الادى. بانكتىك تەحنيكالىق-ەكونوميكالىق نەگىزدەمەنى قارجىلاندىرعاننان كەيىن ۇلەستى 80%-عا جەتكىزۋگە بولادى. شەشىمدەر ءار ۋچاسكە بويىنشا جەكە-جەكە قابىلدانادى.
سونىمەن قاتار Solidcore Japan Gold كومپانياسىنىڭ وزىنە تاعى 6،85 ملن دوللار ينۆەستيسيالادى. كومپانيا كانادالىق التىن ءوندىرۋشىنىڭ 78،8 ملن باعالى قاعازىن ساتىپ الىپ، ونىڭ 18،81% جاي اكسياسىنا يە بولدى. ساتىپ الىنعان ۆاررانتتار ورىندالعان جاعدايدا Solidcore ۇلەسى 19،9%-عا دەيىن ءوسۋى مۇمكىن.
سونداي-اق Solidcore Japan Gold كومپانياسىنىڭ كەمىندە 18% ۇلەسىنە يە بولعانشا، ونىڭ ديرەكتورلار كەڭەسىنە ەكى مۇشە تاعايىنداۋ قۇقىعىن الدى. كەڭەس قۇرامىنا Solidcore كەڭەسشىسى ۆيكتور فلورەس پەن كومپلاەنس جانە كورپوراتيۆتىك باسقارۋ جونىندەگى اتقارۋشى ۆيسە-پرەزيدەنت تاتيانا چەداەۆا كىردى.
اليانسقا بەس ۋچاسكە — Hakuryu، Bajo، Mizobe، Ryuo جانە Aibetsu كىردى. ولار تاريحي التىن وندىرىلگەن اۋدانداردا ورنالاسقان. اتاپ ايتقاندا، Mizobe ۋچاسكەسىنىڭ گەولوگيالىق قۇرىلىمى Japan Gold رەسۋرسىن 13 ملن ۋنسيا التىن دەپ باعالاعان Hishikari كەن ورنىنا ۇقسايدى.
Japan Gold — جاپونيادا جۇمىس ىستەيتىن كانادالىق گەولوگيالىق بارلاۋ كومپانياسى. ونىڭ گەولوگيالىق بارلاۋ قۇقىقتارىنىڭ پورتفەلى 3 مىڭ شارشى كم-دەن اسادى. Solidcore «استانا» حالىقارالىق قارجى ورتالىعىندا تىركەلىپ، AIX بيرجاسىندا ساۋدالانادى. كومپانيا قازاقستاندا ەكى جۇمىس ىستەپ تۇرعان التىن ءوندىرۋ كاسىپورنىن جانە Ertis POX جوباسىن باسقارادى.
بۇعان دەيىن Solidcore اكسيونەرلەرگە ءوز اكسيالارىن كەرى ساتىپ الۋ ارقىلى 1،2 ملرد دوللارعا دەيىن قايتارۋ نيەتىن جاريالاعان. كومپانيا 102،9 ملن باعالى قاعازدى، ياعني اكسيونەرلىك كاپيتالدىڭ شامامەن 23،2%-ىن، ءبىر اكسياسى 11،66 دوللاردان ساتىپ الۋدى جوسپارلاپ وتىر. وتىنىمدەر 12 قازانعا دەيىن قابىلدانادى، ال كەرى ساتىپ الۋ 30 قىركۇيەكتەگى جالپى جينالىستا اكسيونەرلەردىڭ ماقۇلداۋىن الۋى ءتيىس. 1 قىركۇيەكتەگى جاعداي بويىنشا Solidcore قاراجاتى 1،4 ملرد دوللاردى، تازا اقشالاي پوزيسياسى 747 ملن دوللاردى قۇرادى.
سونىمەن قاتار تامىزدا Solidcore ەنشىلەس قۇرىلىمى Tin One Mining سولتۇستىك قازاقستان وبلىسىنداعى سىرىمبەت قالايى كەن ورنىندا تاۋ-كەن بايىتۋ كومبيناتىن سالۋ جوباسىن ىسكە اسىرۋ تۋرالى مەموراندۋمعا قول قويدى. ينۆەستيسيالاردىڭ الدىن الا كولەمى كەمىندە 150 ملرد تەڭگەگە باعالانادى. جوبانى ىسكە اسىرۋ Solidcore ديرەكتورلار كەڭەسىنىڭ ماقۇلداۋىنا بايلانىستى. كاسىپورىندا 800-گە جۋىق جۇمىس ورنىن اشۋ جوسپارلانۋدا.