اقمولا گارنيزونىنىڭ اسكەري سوتى اسكەري قىزمەتشىنىڭ تالابىن قاناعاتتاندىرىپ، تۇرعىن ءۇي كوميسسياسىنىڭ شەشىمىن زاڭسىز دەپ تانىدى، دەپ حابارلايدى infohub.kz سايتى.
اسكەري سوتتىڭ رەسمي Telegram-ارناسىندا حابارلانعانداي، اسكەري قىزمەتشىنىڭ ق ر قورعانىس مينيسترلىگىنىڭ «اقمولا اۋداندىق پايدالانۋ ءبولىمى» رمم-نە قاتىستى تۇرعىن ءۇي كوميسسياسىنىڭ شەشىمىن زاڭسىز دەپ تانۋ تۋرالى اكىمشىلىك ءىسى قارالدى.
سوت انىقتاعانداي، 2026 جىلعى 9 ساۋىردەگى №16 شەشىممەن اسكەري قىزمەتشىگە استاناداعى پاتەرى بولعاندىقتان تۇرعىن ۇيگە مۇقتاج دەپ تانۋدان باس تارتىلعان. الايدا بۇل پاتەر يپوتەكالىق تۇرعىن ءۇي قارىزى ارقىلى ساتىپ الىنعان جانە بانكتە كەپىلدە تۇر، ال قارىز بويىنشا مىندەتتەمەلەر تۇرعىن ءۇي كوميسسياسىنا ءوتىنىش بەرگەن كەزدە ورىندالماعان.
ءىس ماتەريالدارىن زەردەلەي كەلە، سوت تۇرعىن ءۇي كوميسسياسى پاتەردىڭ يپوتەكالىق نەسيە ارقىلى ساتىپ الىنعانىن جانە بانك الدىنداعى ورىندالماعان مىندەتتەمەلەردى ەسكەرمەگەن دەگەن قورىتىندىعا كەلدى. ناتيجەسىندە كوميسسيانىڭ باس تارتۋ تۋرالى شەشىمى زاڭسىز دەپ تانىلىپ، كۇشى جويىلدى.
جاۋاپكەرگە تالاپكەردى راپورت تىركەلگەن كۇننەن باستاپ تۇرعىن ۇيگە مۇقتاج دەپ تانۋ تۋرالى قولايلى اكىمشىلىك اكت قابىلداۋ مىندەتى جۇكتەلدى. سونداي-اق جاۋاپكەردەن مەملەكەتتىك باج سالىعىن تولەۋ بويىنشا سوت شىعىندارى ءوندىرىلدى. تالاپ قويۋ تولىعىمەن قاناعاتتاندىرىلدى، سوت شەشىمى زاڭدى كۇشىنە ەندى.